Кіраўскія педагогі — за бяспеку дзяцей
Як вядома, у гэтыя дні ў краіне, і ў нашым раёне ў прыватнасці, праходзіць пажарна-прафілактычная акцыя па папярэджванні пажараў і гібелі ад іх людзей “За бяспеку разам”. Не застаюцца ў баку ад гэтай важнай справы і педагогі, бо дзеці — гэта тая асаблівая частка насельніцтва, якая патрабуе павышанай увагі.
Трэба адзначыць, што калектыў нашай дашкольнай установы на працягу некалькіх апошніх гадоў вядзе значную работу, накіраваную на забеспячэнне бяспекі жыццядзейнасці сваіх выхаванцаў. Для гэтага распрацоўваюцца і выкарыстоўваюцца самыя разнастайныя формы работы як з самімі дзецьмі, так і з іх бацькамі. З апошнімі, да прыкладу, праводзяцца бацькоўскія сходы, на якія запрашаюцца супрацоўнікі райаддзелаў унутраных спраў і па надзвычайных сітуацыях: яны праводзяць прафілактычную, тлумачальную работу. Да таго ж, бацькі могуць азнаёміцца з разнастайнай інфармацыяй па забеспячэнні бяспекі дзяцей, рабоце педкалектыву на інфармацыйных стэндах, інтэрнет-сайце дашкольнай установы. Цікавасць у бацькоў выклікала нядаўняя кансультацыя: “Як засцерагчы дзіця ад няшчасця”.
Шмат разнастайных і запамінальных мерапрыемстваў было праведзена сёлета з выхаванцамі садка. Аб тым, як паводзіць сябе, знаходзячыся на вуліцы, рабяты даведаліся з тэматычных заняткаў “Вуліца поўная нечаканасцей”. Шмат карыснага для сябе ўзялі дзеці з заняткаў, назва якіх гаворыць сама за сябе: “Як паводзіць сябе з незнаёмцам”. Актыўна прымаючы ўдзел у дыдактычнай гульні “Гадзіннік асцярожнасці”, рабяты пазнаёміліся з мажлівымі небяспечнымі сітуацыямі ў быту, у дамашняй абстаноўцы і якім чынам можна іх пазбегнуць.
Карыснымі былі для дзяцей мерапрыемствы па супрацьпажарнай бяспецы: “Запалкі не цацкі”, “Агонь — сябар, агонь — вораг”. Разнастайныя ўменні і навыкі набывалі рабяты на сюжэтна-ролявых гульнях “Адзін дома”, “Мы — пажарныя”. Цікавасцю карыстаюцца чытанні разнастайных твораў на пажарную тэматыку дзіцячай мовай: “Пажарныя сабакі” Льва Талстога, “Кошкін дом” Самуіла Маршака, “Блытаніна” Карнея Чукоўскага і інш. Часта на занятках выкарыстоўваюцца загадкі аб агні, вадзе, небяспечных бытавых прадметах. Шмат даведваюцца рабяты аб бяспецы жыццядзейнасці таксама з прапанаваных слайдаў, мультфільмаў, кінафільмаў.
Наш педкалектыў і надалей плануе актыўна працаваць у гэтым накірунку. Бо бяспека дзіцяці для педагога стаіць на першым месцы.
Наталля ХАХЛОВА, выхавальнік ясляў-садка №4 горада.