Юрыдычнае суправаджэнне — аснова поспеху
Шматгранная праца спецыялістаў па заканадаўстве запатрабавана як на невялікім прадпрыемстве, так і ў самых высокіх структурах. Талентам быць юрыстам адораны асаблівыя людзі: разумныя і ўважлівыя, знаходлівыя і мэтанакіраваныя.
Менавіта такімі з’яўляюцца супрацоўнікі юрыдычнага аддзела СВК “Рассвет” імя К.П.Арлоўскага. Узначальвае яго кампетэнтны спецыяліст і ўмелы кіраўнік — галоўны юрыст Васіль Улашчанка, кіраўчанін, больш за 5 гадоў працуе на сельгаспрадпрыемстве. За гэтыя гады выпускнік факультэта правазнаўства Беларускай дзяржаўнай сельгасакадэміі паспеў шмат чаго — зрабіць кар’еру, заслужыць аўтарытэт калег і стаць неад’емнай часткай дружнай, вялікай рассветаўскай сям’і. А дапамагае яму дасведчаны спецыяліст Анжэла Пішчаліна, якая таксама звязала сваё жыццё з юрыспрудэнцыяй, скончыўшы Маскоўскі юрыдычны інстытут.
У сувязі з тым, што СВК “Рассвет” імя К.П. Арлоўскага — гаспадарка шматпрофільная, работа юрыдычнага аддзела ўключае ў сябе нямала накірункаў. Пералік яго задач і функцый вельмі шырокі: прававое кансультаванне службовых асоб і структурных падраздзяленняў; заключэнне дагавораў па куплі-продажы вырабляемай прадукцыі; мытнае афармленне тавараў, набытых за мяжой; прадстаўленне інтарэсаў сельгаспрадпрыемства ў судах і іншых дзяржаўных органах; афармленне дакументаў для набыцця пуцёвак у санаторый імя К.П.Арлоўскага; аказанне работнікам дапамогі пры пошуку неабходных нарматыўных прававых актаў і іншае.
Высокваліфікаваныя супрацоўнікі юрыдычнага аддзела любяць сваю справу і адказна выконваюць усе даручэнні.
Настасся ЛОГВІНАВА.
Фота Максіма МІКЕШЫНА.
На здымку: галоўны юрыст Васіль Улашчанка і юрыст Анжэла Пішчаліна з СВК “Рассвет” імя К.П.Арлоўскага.