Сакрэт шчасця кіраўчан Акуленкаў — ва ўзаемным даверы!
Сёлетні год для кіраўчан Аляксандра і Вольгі Акуленкаў — адметны: 10 год таму на свет нарадзілася іх сям’я. Алавянае вяселле муж і жонка сустракаюць з важкім багажом: двое цудоўных дзетак — 8-гадовы Уладзіслаў і 5-гадовая Ульяна, асабістая кватэра ў адным з жыллёвых кааператываў райцэнтра, шмат яскравых, прыемных душы ўспамінаў ад сумеснага жыцця, добрых сямейных традыцый.
Вольга родам з Быхаўшчыны, разам з сям’ёй пераехала ў Букіно, дзе і адбылася лёсавы-значальная сустрэча з будучым мужам. Паўгода хапіла маладым людзям, каб упэўніцца, што яны — паловы адзінага цэлага.
Аляксандр удзячны жонцы за надзейную падтрымку, цеплыню ў іх доме. Ён — дальнабойшчык, Вольга — хатняя гаспадыня, а да гэтага працавала ў галіне грамадскага харчавання. Зараз жанчына вырашыла прысвяціць сябе сям’і, выхаванню дзетак. Уладзік вучыцца ў 2 класе, а Ульяна наведвае дзіцячы садок. Муж і жонка лічаць, што ў іх выхаванні асноўны прыклад для пераймання — бацькоўскі.
Па адной з сямейных традыцый, першыя дні новага года Акуленкі стараюцца праводзіць разам: абавязкова наведваюць аквапарк, піцэрыю і любуюцца навагоднімі гарадскімі ёлкамі.
Напярэдадні юбілейнага вяселля Аляксандр і Вольга прызнаюцца, што за 10 год давялося прыкласці намаганні, каб зараз у іх доме панавалі згода, мір і ўтульнасць. Галава сям’і адзначыў, што галоўны сакрэт сумеснага шчасця — у даверы: “Добрыя адносіны — гэта вынік карпатлівай работы з боку ўсіх членаў сям’і, гармонія нараджаецца там, дзе муж і жонка імкнуцца да агульнага разумення, вучацца ўспрымаць адзін аднаго такімі, якія ёсць”.
Яўгенія БЯЛЬКО.
Фота Максіма МІКЕШЫНА.