Каманда Кіраўскага раёна на чале са старшынёй райвыканкама Аляксандрам Бутаравым прыняла ўдзел у “Беларускай лыжні-2017” у Магілёве
Зімовае спартыўнае свята “Беларуская лыжня-2017” прайшло напрыканцы мінулага тыдня ў Пячэрскім лесапарку г.Магілёва. Яно сабрала больш за 500 чалавек з усіх раёнаў вобласці, а таксама абласнога цэнтра і г.Бабруйска.
Удзел у спартыўным свяце прыняла і дружная каманда нашага раёна на чале са старшынёй райвыканкама Аляксандрам Бутаравым.
Удзельнікаў вітаў старшыня Магілёўскага аблвыканкама Уладзімір Даманеўскі.
Лыжныя гонкі праходзілі па 13 узроставых катэгорыях. На дыстанцыю выходзілі прадстаўнікі аблвыканкама, кіраўнікі гаррайвыканкамаў і іх намеснікі, іншыя аматары лыжнага спорту.
Пераможцы і прызёры спаборніцтваў атрымалі заслужаныя ўзнагароды. Дарэчы, прадстаўнік каманды нашага раёна Андрэй Бяляўскі заваяваў “бронзу” ў сваёй узроставай катэгорыі.
Акрамя спаборніцтваў арганізатары свята падрыхтавалі культурна-забаўляльную праграму з удзелам творчых калектываў. Гасцей і ўдзельнікаў мерапрыемства частавалі смачнай салдацкай кашай і чаем з вялізнага самавара.
Па водгуках удзельнікаў, “Беларуская лыжня-2017” атрымалася масавай, відовішчнай, пакінула шмат станоўчых эмоцый і дала запал бадзёрасці.
Фота
Яўгена ПІШЧАЛІНА і Галіны ГАЎРЫЛОВІЧ.