Прадстаўніцы нашага раёна на абласным конкурсе аператараў машыннага даення: Святлана Зыранава з СГФ “Чыгірынка”, Алена Арцюкоўская з КСУП “Ніва-Барсукі”, Ірына Зыранава з СГФ “Чыгірынка” і Ніна Ляўковіч з КСУП “Жылічы”.

З удзельніцамі абласнога конкурсу — старшыня райкама прафсаюза работнікаў АПК Віктар Ставер і член журы, дырэктар установы дадатковай адукацыі дарослых “Цэнтр падрыхтоўкі, павышэння кваліфікацыі і перападрыхтоўкі рабочых” камітэта па сельскай гаспадарцы і харчаванні Магілёўскага аблсельгасхарчу Віктар Гарбачэўскі.

На мінулым тыдні ў г.Горкі на базе навучальнай фермы РУП “Учхоз БГСХ” прайшоў абласны конкурс аператараў машыннага даення. Удзел у ім прыняло больш за 70 канкурсантаў.
Арганізатарамі мерапрыемства выступілі абласны камітэт Беларускага прафсаюза работнікаў АПК, камітэт па сельскай гаспадарцы і харчаванні Магілёўскага аблвыканкама і галоўнае ўпраўленне ідэалагічнай работы, культуры і па справах моладзі аблвыканкама.

Ад кожнага раёна былі прадстаўлены па 4 аператары. Кіраўшчыну на гэтым конкурсе прадстаўлялі Ірына і Святлана Зыранавы з СГФ “Чыгірынка” РУП “Беларуснафта-Магілёўаблнафтапрадукт”, Ніна Ляўковіч з КСУП “Жылічы” і Алена Арцюкоўская з КСУП “Ніва-Барсукі”. Ірына і Святлана дэманстравалі сваё майстэрства ва ўзроставай падгрупе да 31 года.
Конкурс складаўся з некалькіх іспытаў: праверка тэарэтычных ведаў, разборка і зборка даільнага апарата на хуткасць, практычнае заданне па даенні кароў. Пры падвядзенні вынікаў журы ўлічвала тэхналагічнасць і вытворчасць працы, а таксама культуру работы канкурсантаў.
Прадстаўніцам нашага раёна крыху не хапіла балаў, каб увайсці ў лік лідараў конкурсу. Аднак кіраўчане сталі пераможцамі ў намінацыі за лепшы знешні выгляд каманды і паўнату забеспячэння фірмовым і рабочым спецаддзеннем (пашывам якога займалася УКП “Кіраўскія бытпаслугі”) і атрымалі ўзнагароды і каштоўныя падарункі.
Святлана Зыранава за дасягненне добрых вынікаў падчас конкурсу была адзначана спецыяльным прызам ад “Гомелькамплект”.
Падчас правядзення конкурсу былі названы сельгасарганізацыі-пераможцы па выніках
работы за 2016 год
па ўдоі малака на карову. На другім месцы з удоем на карову 7775 кг — КСУП “Чырвоны баец”.