Ёсць і ў плаванні поспехі ў кіраўчан!
Плаванне — даволі “цяжкі” ў асваенні від спорту для кіраўчан. Адна справа — паплаваць улетку ў вадаёме і зусім іншая — займацца прафесіянальна. Адсутнасць у райцэнтры басейна, безумоўна, накладвае свой адбітак. І ўсё ж асобныя жыхары раёна, нягледзячы на фінансавыя расходы, прывучаюць сваіх дзяцей да гэтага цудоўнага віду спорту, літаральна штодня адвозячы іх на заняткі ў басейн Бабруйска. Намаганні даюць плён: ёсць у кіраўчан нарэшце поспехі і ў плаванні!
Раённыя спаборніцтвы па плаванніў праграме Спартакіяды школьнікаў прайшлі на базе спартыўнага комплексу аг. Ціхінічы Рагачоўскага раёна Гомельшчыны. Удзел у іх прынялі 4 каманды. Перамогу атрымалі юныя плаўцы з СШ №1 райцэнтра. Аляксандр Аляксееў і брат з сястой Кірыл і Вольга Прыходзькі, якія шліфуюць уменні на водных дарожках басейна ў Бабруйску, аказаліся мацнейшымі за сваіх апанентаў. Другое і трэцяе месцы занялі каманды Паўлавіцкай СШ імя Р.А.Худалеева і Чыгірынскай СШ.
Каманда-пераможца абараняла гонар раёна на абласных спаборніцтвах. Упершыню ў гэтым відзе спорту! У агульным заліку кіраўчане занялі 7-е месца з 10-ці каманд. У заплывах прынялі ўдзел 185 чалавек. Многія з сапернікаў, між тым, былі старэйшымі па ўзросце, шэраг з іх ужо носяць званне кандыдатаў у майстры спорту…
Ды і ў асабістым заліку ёсць добрыя вынікі. Вольга Прыходзька ў дзвюх дысцыплінах заваявала “бронзу”: на дыстанцыі 50 м вольным стылем яна змагалася з 45 плаўчыхамі, а на 100-мятроўцы брасам саперніцамі нашай зямлячкі былі 12 дзяўчат. Дарэчы, і Вольга, і яе брат Кірыл пацвердзілі падчас выступленняў у Магілёве другі дарослы разрад, Аляксандр Аляксееў пацвердзіў першы юнацкі.
Яркай адметнасцю абласных спаборніцтваў стаў удзел у цырымоніі ўзнагароджвання юных спартсменаў славутай беларускай плаўчыхі Аляксандры Герасімені. Двухразовы сярэбраны прызёр Алімпійскіх гульняў у Лондане і бронзавы прызёр галоўных сусветных спаборніцтваў у Рыа-дэ-Жанейра прадэманстравала ўдзельнікам майстар-клас і сфатаграфавалася з прызёрамі. Пашчасціла трапіць у аб’ектыў са знакамітай спартсменкай і Вользе Прыходзька.
Аляксандр ХАХЛОЎ.
Фота аўтара і з сайта fok.mogilev.by