Жанна РЫШКЕВІЧ, старшыня Скрыпліцкага сельскага Савета дэпутатаў:
— Лічу, што прыняцце Дэкрэта №3 “Аб папярэджванні сацыяльнага ўтрыманства” цалкам адпавядае рэаліям сучаснага жыцця. Беларусь — сацыяльна арыентаваная дзяржава: для выканання ўсіх узятых на сябе абавязацельстваў па падтрымцы грамадзян, маючых у гэтым патрэбу, неабходны значныя фінансавыя сродкі. З пункту гледжання сацыяльнай справядлівасці выплата падаткаў павінна ажыццяўляцца ўсімі грамадзянамі, якія знаходзяцца ў працаздольным узросце. Не варта забываць, што за кошт сродкаў дзяржаўных датацый з бюджэту краіны штогод забяспечваецца фінансаванне сістэм аховы здароўя, адукацыі, культуры і спорту, жыллёва-камунальнай гаспадаркі, грамадскага транспарту, сувязі, аб’ектаў сацыяльнай інфраструктуры. Усе мы ў той ці іншай ступені карыстаемся гэтымі сацыяльнымі дабротамі, аднак, некаторыя працаздольныя людзі на працягу дзесяцігоддзяў не заплацілі ні аднаго рубля падаткаў. І дзе ж тут справядлівасць?
Ёсць такія грамадзяне і на тэрыторыі Скрыпліцкага сельсавета: яны пастаянна выязджаюць на работу ў суседнюю Расію, зарабляюць там грошы, і нічога дрэннага ў гэтым няма. Справа ў іншым: іх дзеці наведваюць установы адукацыі, культуры, звяртаюцца ў бальніцу, прычым усё гэта для бацькоў бясплатна. Самі ж грамадзяне патрабуюць адрамантаваць дарогі, калодзежы. Дык чаму ж тым, хто мае магчымасць, не паўдзельнічаць у фінансаванні дзяржрасходаў нараўне з усімі?! Лічу, што гэта будзе правільна.
Як дэпутат Скрыпліцкага сельскага Савета дэпутатаў, праводжу індывідуальныя сустрэчы і гутаркі з жыхарамі сельсавета, якія занесены ў спісы непрацуючых. У кожным канкрэтным выпадку разбіраюся ў прычынах, па якіх грамадзянін не працуе і не плаціць падаткі. Рэкамендую, куды можна звярнуцца для таго, каб даведацца аб праве на вызваленне ад уплаты збору, якія для гэтага неабходна прадаставіць дакументы.
Падчас сустрэч з сяльчанамі, у тым ліку і з непрацуючымі, імкнуся данесці да іх інфармацыю аб тым, што, як адзначыў наш Прэзідэнт Аляксандр Рыгоравіч Лукашэнка, усе сабраныя згодна Дэкрэта №3 фінансавыя сродкі будуць выкарыстоўвацца менавіта на падтрымку дзяцей у розных сферах. А гэта значыць, што мы падтрымаем, пасадзейнічаем духоўнаму і творчаму развіццю сённяшніх хлопчыкаў і дзяўчынак, якім у хуткім часе жыць і працаваць на карысць працвітання Беларусі, дабрабыту яе народа.

Людміла ДАРОШКА, спецыяліст па сацыяльнай рабоце раённага цэнтра сацыяльнага абслугоўвання насельніцтва, дэпутат раённага Савета дэпутатаў:
— Усе мы жывем у сацыяльнай дзяржаве і разам карыстаемся яе дабротамі. Мэтанакіраванасць Дэкрэта №3 заключаецца ў тым, што ён паказаў рэальную карціну на рынку працы, калі чалавек, працуючы нелегальна, пазбягае падаткаабкладання, што неправамерна ні ў адной краіне свету. А тым часам сам ці яго сям’я карыстаюцца сацыяльнымі льготамі, на якія нарабляюць іншыя. Людзі, якія працуюць афіцыйна, плацяць падаткі ў Фонд сацыяльнай абароны насельніцтва і ўдзельнічаюць ва ўзнаўленні дзяржрасходаў. Але па-вінны ўсе быць у роўных умовах.
Вельмі правільна, што кожны выпадак, кожная жыццёвая сітуацыя разглядаецца індывідуальна. У гэтым плане значная адказнасць кладзецца на дэпутацкі корпус. Зараз намі праводзіцца канкрэтная работа па растлумачэнні непрацуючым пра неабходнасць працаўладкавання, каб мець магчымасць утрымліваць сябе і сям’і. Дэпутаты сустракаюцца непасрэдна з людзьмі, у тым ліку з тымі, хто ўжо заплаціў збор на фінансаванне дзяржрасходаў. Наша задача — разабрацца, па якой прычыне чалавек не працаваў, падказаць, што рабіць і куды звяртацца, дапамагчы працаўладкавацца.