Лепшы калектыў фізкультуры Кіраўшчыны — каманда ААТ “Рассвет імя К.П.Арлоўскага”
ААТ “Рассвет імя К.П.Арлоўскага” акрамя багатых працоўных традыцый мае ў сваім актыве не менш важкія традыцыі спартыўныя. За шматгадовую гісторыю ўпісана шмат выдатных старонак у спартыўны летапіс гаспадаркі.
Фізічнай культуры тут заўсёды адводзілася і адводзіцца асаблівае месца. Тут прытрымліваюцца прынцыпу, што чалавек акрамя працы павінен мець магчымасць адпачыць. Прычым адпачыць актыўна, з карысцю, у першую чаргу, для сябе. А дапамагае ў гэтым, безумоўна, спорт. Мясцовыя фізкультурнікі не прапускаюць практычна ніводных спаборніц-тваў у раёне, выязджаюць і за яго межы.
Актыўнасць дае свой плён. Ужо 11 (!) сезонаў запар рассветаўцы нязменна становяцца пераможцамі раённай круглагадовай Спартакіяды сярод калектываў фізкультуры. У чарговы раз не было ім роўных летась і ў раённай Спартакіядзе сярод сельскіх жыхароў. Пра тое, што прадстаўнікі акцыянернага таварыства, як звычайна, прымалі ўдзел ва ўсіх відах, гаварыць не варта — на іх рахунку практычна толькі першыя і прызавыя месцы. У восьмы раз запар зборная “Рассвета” стала пераможцай раённага турыстычнага злёту. Прычым, адзначым, што практычна на усіх спаборніцтвах каманда — самая масавая, прадстаўнічая і рознаўзроставая.
Далёка не ў кожным калектыве ёсць такое ўзаемаразуменне паміж кіраўніцтвам і аматарамі спорту. І гэта адно са складаемых поспеху. У “Рассвеце” прага да перамог — у любой сферы дзейнасці — закладзена, калі можна так сказаць, на генным узроўні. Спорт — не выключэнне. У развіцці фізічнай культуры, прапагандзе здаровага ладу жыцця работнікаў засёды зацікаўлена кіраўніцтва сельгаспрадпрыемства, ідэалагічны аддзел, прафсаюзны камітэт. На гэта выдаткоўваюцца грашовыя сродкі, заўсёды, калі трэба, выдзяляецца транспарт. А пры ўручэнні ўзнагарод лепшым работнікам гаспадаркі падчас штогадовага сходу па падвядзенні вынікаў работы гучаць з трыбуны імёны і лепшых спартсменаў — ёсць нават асобная такая намінацыя. Супрацоўнікамі ідэалагічнага аддзела афармляецца стэнд, на якім размешчана інфармацыя, фотаздымкі аб спартыўным жыцці таварыстваства, дасягненнях. А яшчэ больш ярка ўражвае калекцыя кубкаў і дыпломаў, якая пастаянна папаўняецца.
Многія з тых, хто абараняе гонар гаспадаркі сёння, вучыліся ў свой час у Мышкавіцкай СШ. Яны з удзячнасцю ўспамінаюць урокі фізічнай культуры і свайго выкладчыка А.Ф.Худалея, дякуючы якім спорт назаўсёды ўвайшоў у іх жыццё.
У ліку ветэранаў спартыўнага руху, якія пастаянна ў страі, — Алег Шапавалаў, Андрэй Бяляўскі, Сяргей Лянкевіч, Вера Гаўрылава. Умела арганізоўвае работу і сам актыўна ўдзельнічае ў спаборніцтвах начальнік ідэалагічнага аддзела гаспадаркі Яўген Пішчалін. Удала ўліліся ў спартыўны калектыў Андрэй Горбач, Вольга Пішчаліна, Алеся Шалянгоўская, Аляксандр Сукора, Алена Шалыгіна і шмат іншых.
Усе разам, агульнай дружнай спартыўнай сям’ёй рыхтуюцца рассветаўцы да новых перамог.
Аляксандр ХАХЛОЎ.