Выпускны вечар прайшоў у дзіцячай школе мастацтваў г.Кіраўска
На выпускным вечары са справаздачным канцэртам у дзіцячай школе мастацтваў г.Кіраўска шчыра ўшанавалі выпускнікоў, прадэманстравалі свае таленты і здольнасці гледачам, сярод якіх былі намеснікі старшыні райвыканкама Таццяна Бяляўская і Вячаслаў Нявінскі, намеснік начальніка аддзела ідэалагічнай работы, культуры і па справах моладзі райвыканкама Валянціна Іваніцкая, бацькі, родныя выхаванцаў школы, сябры, кіраўчане.
Мелодыяй песні “Маленькі прынц”, своеасаблівым падарожжам у дзяцінства, распачаў вечар дзіцячы духавы аркестр пад кіраўніцтвам Аляксандра Хадакова.
Прысутных вітала дырэктар установы Наталля Кавалёва і выказала
ўдзячнасць педагогам школы за зладжаную работу, мабільнасць і творчую ініцыятыву, адказнасць і энтузіязм, а таксама бацькам вучняў — за ўдзел у развіцці творчых здольнасцей сваіх дзяцей.
Мінулы навучальны год быў напоўнены яркімі падзеямі, выступленнямі. Заўжды на першым месцы, як падкрэсліла Наталля Кавалёва, былі адукацыйная і конкурсная дзейнасць. Адсюль — і рэзультат: 52 дыпломы, у тым ліку і на рахунку юных выхаванцаў школы. Прагучалі ўдзячныя словы ў адрас педагогаў за выніковую падрыхтоўку вучняў да конкурсаў, фестываляў розных узроўняў — Людмілы Каранкевіч, Аліны Якавенка, Кацярыны Мурашка, Ірыны Лебедзевай-Чыжонак, Святланы Шакаравай, Аксаны Дзенісенка, Кацярыны Палішчук, канцэртмайстра Ларысы Каранкевіч, Наталлі Рублеўскай, Алы Каратковай, а таксама за асабісты ўклад у поспехі на міжнародных і рэгіянальных конкурсах — Жанне Кудзінай, Кацярыне Пінчук, Яне Іваніцкай.
У цэнтры ўвагі былі выпускнікі — іх сёлета 35. “Хочацца спадзявацца, — адзначыла дырэктар школы, звяртаючыся да рабят, — што гады навучання застануцца для вас яркім успамінам, а атрыманыя веды і ўменні спатрэбяцца ў жыцці”.
Выпускнікам былі ўрачыста ўручаны пасведчанні аб заканчэнні ўстановы. Асаблівая пашана — выдатнікам: музычнага накірунку дзейнасці — Уладзіславу Нявінскаму (клас Аляксандра Хадакова), выяўленчага накірунку — Дар’і Каранкевіч і Вользе Катургіной (клас Аліны Якавенка), Аляксандры Анісімавай (мастацкі клас аг.Барчыцы Кацярыны Мурашка).
Ад імя бацькоў шчырую ўдзячнасць выказала педагогам Святлана Нявінская.
Яе сын Уладзіслаў, які, дарэчы, на працягу ўсіх 7 гадоў навучання быў выдатнікам, актывістам, на канцэрце па-майстэрску сыграў на саксафоне пад агульныя апладысменты залы.
Падзячныя словы настаўнікам і бацькам ад імя выпускнікоў выказала Надзея Шчэрбіч.
Былі адзначаны рабяты, якія выдатна закончылі навучальны год, а таксама тыя, хто праявіў сябе на прэстыжных конкурсах, у прыватнасці, Ігар Урбановіч, Вадзім Арцюхоў, іншыя. Яны і вучні ўсіх накірункаў дзейнасці — музычнага, выяўленчага, тэатральнага, харэаграфічнага — пераканалі, што шмат чаму навучыліся, і захапленне мастацтвам прыносіць задавальненне і ім самім, і тым, каму адрасавана іх творчасць.
Наталля ХАДАКОВА.
Фота
Максіма МІКЕШЫНА.