РАПСодыя ліпеньскага поля “Чырвонага байца”
Калі на мінулым тыдні з-за рознай вільготнасці пасеваў азімага рапсу частка сельгапрадпрыемстваў раёна яшчэ “прыстрэльвалася” да яго абмалоту, то зараз паўсюдна прыступілі да актыўнай уборкі каштоўнай алейнай культуры.
У разгары ўборка азімага рапсу ў КСУП “Чырвоны баец”, дзе мы пабывалі ўчора. У мінулую пятніцу збожжаўборачныя камбайны прымераліся да аднаго з найбольш спелых палёў. Абкатка выдалася паспяховай, і ў выхадныя работа пайшла поўным ходам. Трыма машынамі па стане на ўчарашнюю раніцу камбайнеры Аляксандр Сіндараў, Дзяніс Казанцаў і Валерый Дырыкаў убралі культуру на 110 га, намалаціўшы пры гэтым 218 тон масланасення. За светлавы дзень кожны з іх у сярэднім абмалочвае па 25 га.
Да непасрэдных месцаў палявых дзеянняў мы адправіліся разам з брыгадзірам вытворчага ўчастка Фёдарам Еўдакімавым. Пакуль рухаемся на яго жвавай “Ніве”, вядзем гутарку. Да слова, за плячамі аднаго з найбольш вопытных аграрыяў гаспадаркі — 35-гадовы стаж вядзення палявых работ.
— Кожнае жніво хвалюючае, — заўважае Фёдар Сцяпанавіч. — Ва ўраджай штогод укладваецца шмат фізічных і маральных сіл. А вось якім ён атрымаецца, не заўсёды поўнасцю залежыць ад сяльчан. Сёлетняе жніво, да прыкладу, па тэрмінах уборкі з-за дажджоў крыху зрушылася. Мы зрабілі практычна ўсё ад нас залежачае, каб намалот быў як мага больш важкім. І, трэба адзначыць, пасевы радуюць вока. Добра наліліся каласавыя. Ды і рапсавая “сцяна” набралася сіл. Цяпер галоўная задача — хутка і якасна ўбраць вырашчанае, каб не перашкодзіла надвор’е ці нечаканыя паломкі — пэўная тэхніка мае ўжо вялікі працэнт зношанасці.
Як расказаў далей Фёдар Еўдакімаў, да ўборачнай кампаніі падрыхтаваліся ў гаспадарцы трывала: паставілі на лінейку гатоўнасці 6 наяўных збожжаўборачных камбайнаў, іншую тэхніку, якая задзейнічана на жніве. Гатова для прыёму зерня і сушыльная гаспадарка: работу дзвюх газавых сушылак будуць забяспечваць два звяны па тры чалавекі, прычым перапрацоўка збожжа будзе арганізавана кругласутачна.
…Тым часам на палявой дарозе паказаўся камбайн КЗС-1218, які рухаўся нам насустрач. За ім рухаліся яшчэ два.
— Закончылі ўчастак, — патлумачыў, спыніўшыся, рулявы галаўной машыны Дзяніс Казанцаў. — Пераязджаем на новы…
— Добра, хлопцы, — пахваліў механізатараў брыгадзір. — Заварочвайце ўправа, да вёскі Зарубін Вугал. Тут рапс найбольш падышоў да ўборкі…
Камбайны звярнулі з дарогі і, пад’ехаўшы да кучарава-стручкаватага поля, уключылі жаткі і адправіліся ў чарговае працоўнае падарожжа. Побач з полем размясціліся і іншыя ўдзельнікі ўборачнага працэсу: машына тэхнічнага абслугоўвання, пажарны аўтамабіль. Завіхаліся таксама тры магутныя МАЗы — гэта вадзіцелі Аляксандр Ермалаеў, Юрый Кітоў і Мікалай Аляксееў хутка адвозілі намалочанае насенне рапсу ад камбайнаў.
Дарэчы, увесь вырашчаны рапс “Чырвоны баец” адразу адпраўляе пад выкананне дзяржзаказу, а таксама на перапрацоўчае прадпрыемства.
На свежазжатых палетках эстафету ад збожжаўборачных камбайнераў падхоплівае кормакамбайн КЗР-10, кіруе якім Аляксандр Макаронак. Ён здрабняе масу і загружае ў побач ідучыя ПІМы: на трактарах з гэтымі прычэпамі дастаўляюць яе да закладкі ў бурты Міхаіл Пратасаў і Павел Букаты. У хуткім часе на зжатых рапсавых палях з’явіцца дыскатар, з дапамогай якога глеба будзе апрацоўвацца пад азімую сяўбу. У гаспадарцы мяркуюць размясціць тут азімыя збожжавыя: рапс — вельмі добры папярэднік пад іх.
Жніво — безумоўна, перыяд вельмі адказны і знакавы для кожнага сельгаспрадпрыемства. Але ж паралельна нельга забывацца і пра нарыхтоўку кармоў для грамадскага пагалоўя. У “Чырвоным байцы” гэта добра разумеюць, да таго ж, і пагалоўе ў гаспадарцы вялікае. Зараз паўторна скашваюцца шматгадовыя травы. Працуе тут Яўген Кандраценка. Падварочвае пракосы і адпаведна правяльвае масу Віталь Бяляўскі. Закладваецца яна па інтэнсіўнай тэхналогіі — у палімерную ўпакоўку. Гэты від работ даручаны Віктару Аляксееву.
…Вось-вось у сельгаспрадпрыемстве прыступяць да ўборкі збожжавых і зернебабовых культур. Каля 1500 гектараў займаюць яны ў структуры мясцовых пасяўных плошчаў. Налітыя каласы чакаюць клапатлівых сялянскіх рук.
Аляксандр ХАХЛОЎ.
Фота аўтара.