На службе ў жыхароў Кіраўшчыны — блакітнае паліва

Горга-гортоп-3

Горга-гортоп-2

Думаецца, няма сёння сумненняў кагосьці пераконваць у перавагах такога віду паліва, як газ. Той, хто аднойчы паспбрабаваў выкарыстоўваць менавіта яго, наўрад ці адмовіцца яд вартасцей блакітнага паліва, якое трывала ўвайшло ў наш побыт, шырока выкарыстоўваецца ў прамысловасці. Увесь спектр паслуг, які тычыцца газу, на Кіраўшчыне звязаны з раёнам газазабеспячэння філіяла “Бабруйскае вытворчае ўпраўленне” (Кіраўскі РГС філіяла ПУ “Бабруйскгаз”).

Як адзначыў у размове начальнік філіяла Генадзь Пінчук, асноўным відам дзейнасці прадпрыемства з’яўляецца размеркаванне газавага паліва па трубаправодах і яго рэалізацыя. Філіял аказвае паслугі па будаўніцтву размеркавальных і ўнутрыдамавых сістэм газазабеспячэння, рамонце і эксплуатацыі газавыкарыстоўваемага абсталявання. Вырашаецца комплекс задач, звязаных з газіфікацыяй Кіраўшчыны: будаўніцтва адпаведных сетак, газазабеспячэнне прамысловых, сельскагаспадарчых, камунальна-бытавых спажыўцоў і насельніцтва райцэнтра і раёна ў цэлым. Вялікая ўвага надаецца прапагандзе бяспечных метадаў карыстання газам у быце і ахове сістэм газазабеспячэння.

На бягучы момант агульная працягласць абслугоўваемых у раёне газаправодаў складае 181 км. На балансе знаходзяцца 8 газарэгулятарных і столькі ж шафных пунктаў, а таксама 69 газавых засавак.

З пачатку бягучага года, адзначыў Генадзь Пінчук, насельніцтву і прамысловым спажыўцам рэалізавана больш за 9 млн. м3 прыроднага газу, да канца года плануецца давесці гэтую лічбу да 15 млн. м3. Звадкаванага газу сёлета рэалізавана 204 т.

У цэлым па раёне на сёння газіфікавана 12 263 жылыя кватэры, з іх з выкарыстаннем звадкаванага газу — 7971 кватэра, пераведзена на прыродны — 4292. Маюцца таксама 2725  газавых катлоў, 939 воданагравальнікаў, 531 рэгулятар сярэдняга ціску.

Акрамя насельніцтва філіял забяспечвае газам Кіраўскі харчовы камбінат, кацельні “Жылкамгаса” і 6 сельскагаспадарчых прадпрыемстваў. Самы ж асноўны спажывец з іх — ААТ “Рассвет імя К.П.Арлоўскага”, а, дакладней, мясцовы цяплічны камбінат.

Сёлета завяршаецца газіфікацыя жыллёва-будаўнічага кааператыву “Цясоўскі” ў аг.Мышкавічы. Пабудаваны ўжо размеркавальныя сеткі газаправоду ў в.Букіно, і мясцовыя жыхары ўжо адчулі перавагі прыроднага газу.

Шмат перад філіялам стаіць і планаў. У хуткім часе чакаецца газіфікацыя аграгарадкоў Баравіца і Скрыпліца: ужо зроблена для гэтага праектная дакументацыя. На бягучы год запланаваны перавод на прыродны газ 55 кватэр, 19 з якіх — пераведзены. Будзе сёлета газіфікаваны новы 20-кватэрны дом па вул.Гагарына райцэнтра.

Паспяховае вырашэнне разнастайных задач у пераважнай большасці заключаецца ў зладжанай рабоце калектыву філіяла, у якім сёння працуе 50 чалавек. Многія з іх — вопытныя работнікі. Яны штогод паказваюць высокія працоўныя рэзультаты. Шмат гадоў шчыруе вадзіцель Ігар Бяляўскі, сёлета яго партрэт будзе размешчаны на Дошцы гонару РУП “Магілёўаблгаз”. Добрых слоў заслугоўвае таксама шчырая праца галоўнага інжынера Віктара Каранкевіча, газаэлектразваршчыка Аляксандра Скараходава, слесара па эксплуатацыі вонкавых газаправодаў Мікалая Сітцава, аператара ЭВМ Ірыны Фраловай і многіх іншых.

Аляксандр ХАХЛОЎ.

Фота Максіма МІКЕШЫНА.

Добавить комментарий

Ваш адрес email не будет опубликован.