Для сям’і кіраўчан Навіцкіх-Дрозд 1 верасня — хвалюючы і асаблівы дзень: блізняты Ігар і Кірыл сталі першакласнікамі. Учарашнія дашкольнікі ў прыгожых касцюмах выглядаюць не па гадах сур’ёзна. І хоць дзяцінства для хлопчыкаў яшчэ не заканчваецца, паход у першы клас — гэта своеасаблівы крок у дарослае жыццё. Рабяты ўпэўнены, што падчас вучобы ў школе ўсё ў іх абавязкова будзе атрымлівацца, а калі спатрэбіцца дапамога — побач заўсёды старэйшая сястрычка Аліна, якая сёлета пайшла ў 5-ы клас.

Сёння ва ўсіх установах адукацыі горада і раёна праходзяць урачыстыя лінейкі, гучаць залівістыя школьныя званкі, якія абвясцілі аб пачатку новага навучальнага года і запрасілі рабят у абноўленыя прыгожыя класы.
Першы ўрок ва ўсіх класах пройдзе пад назвай «Беларусь — мая Айчына!».
Белыя банцікі, строгія касцюмы, вясёлыя ўсмешкі і букеты прыгожых кветак… Менавіта так выглядаюць сёння юныя жыхары Кіраўшчыны. Для соцень хлопчыкаў і дзяўчынак гэта доўгачаканы дзень: яны сустрэнуцца са сваімі любімымі настаўнікамі, сябрамі-аднакласнікамі. А галоўнае — адкрыюць новую старонку ў цікавую і захапляльную Краіну ведаў.
Сёлета на Кіраўшчыне свае дзверы для рабят адчынілі 22 установы адукацыі: 7 сярэдніх школ, 4 навучальна-
педагагічныя комплексы і 11 дашкольных навучальных устаноў. За парты селі 1936 вучняў: 1086 — у гарадскіх і 850 — сельскіх установах адукацыі.
Упершыню пераступілі парог устаноў адукацыі 187 першакласнікаў (113 — у горадзе і 74 — на вёсцы).
Сваю працоўную дзейнасць на ніве адукацыі ў гэтым годзе пачалі 13 маладых спецыялістаў, якія па размеркаванні прыехалі на Кіраўшчыну.