Акцыя “Дзіця міру” прайшла на Кіраўшчыне
Штогод, падчас правядзення акцыі “Дзіця міру”, ініцыіраванай абласным аддзяленнем ГА “Беларускі фонд міру”, у нашым раёне ўшаноўваюцца бацькі дзяцей, нарадзіўшыхся ў Міжнародны дзень міру — 21 верасня. Вось і сёлета ганаровы спіс нованароджаных, якія з’явіліся на свет у гэты дзень, папоўніўся імёнамі трох маленькіх жыхароў Кіраўшчыны.
Шчаслівымі бацькамі сталі Вольга і Максім Тыкоцкія з Кіраўска — у іх нарадзіўся сынок, у сем’ях Веранікі і Сяргея Смайлавых з Мышкавіч і Гульнары і Андрэя Клімовічаў з Кіраўска з’явіліся на свет дачушкі.
У мінулую сераду шчаслівыя сем’і наведалі старшыня раённай арганізацыі ГА “Беларускі фонд міру” Вольга Гаршкова, старшыня раённай арганізацыі ГА “Белая Русь” Васіль Маркевіч (на здымку). Яны павіншавалі бацькоў з адметнай падзеяй у жыцці, пажадалі нованароджаным здароўя, шчасця, міру і дабрыні, уручылі бацькам пасведчанні аб прысваенні немаўлятам ганаровага статусу “Дзіця міру”, а таксама матэрыяльную дапамогу.
Для мнагадзетнай сям’і кіраўчан Вольгі і Максіма Тыкоцкіх сынок, які з’явіўся на свет у верасні бягучага года, быў жаданым і чаканым дзіцяці: па-першае, як і ўсе мужчыны, галава сям’і вельмі хацеў сына (у сям’і яшчэ дзве старэйшыя дачушкі), а, па-другое, — маленькая Аляксандра іншы раз, стоячы перад іконай Божай Маці, прасіла, каб у яе з’явіўся брацік.
Маладая сям’я жыве ў трохпакаёвай кватэры, якая была прадастаўлена Вользе райвыканкамам, як асобе з ліку дзяцей-сірот і дзяцей застаўшыхся без бацькоўскай апекі: так склаўся лёс, што ў свой час дзяўчынка пры жывых бацьках выхоўвалася ў прыёмнай сям’і. Для сваіх жа малышоў Вольга з мужам робяць усё магчымае, каб у іх было шчаслівае дзяцінства, напоўненае клопатамі, пяшчотай і бясконцай бацькоўскай любоўю.