У мінулую нядзелю для былых работнікаў КСУП “Ніва-Барсукі”, якія цяпер знаходзяцца на заслужаным адпачынку, было наладжана святочнае мерапрыемства. Падобныя сустрэчы тут ужо сталі добрай традыцыяй.  

З прывітальным словам да прысутных звярнуўся дырэктар КСУП “Ніва-Барсукі” Іван Рыняк. Ён павіншаваў усіх жанчын з Днём маці і пажадаў ім моцнага здароўя, удзячных і клапатлівых дзяцей.
Звяртаючыся да прысутных, Іван Рыняк адзначыў, што сённяшнія працаўнікі сельгаспрадпрыемства заўсёды памятаюць, што ля вытокаў развіцця сельгасвытворчасці ўвесь час стаялі старанныя, адказныя і добрасумленныя людзі, якія аддалі адной з самых важных галін народнай гаспадаркі шмат гадоў свайго жыцця, уклалі ў яе часцінку сваёй душы, заклалі надзейны падмурак для сённяшніх поспехаў.
Па словах Івана Рыняка, ва ўсе часіны было і застаецца галоўным для кіраўніцтва — людзі, працаўнікі. Таму ў гаспадарцы пастаянна ідзе работа па паляпшэнні ўмоў працы: абсталяваны бытавыя памяшканні, вядзецца мадэрнізацыя вытворчых працэсаў. Былыя даяркі па-добраму зайздросцяць цяперашнім працаўніцам ферм: наколькі лягчэйшым стаў зараз той жа працэс даення кароў. Некаторыя аперацыі, дзе раней выкарыстоўвалася толькі ручная праца, выконваюцца простым націсканнем кнопкі, што не толькі значна палегчыла работу, але і станоўча паўплывала на якасць атрымліваемай прадукцыі.
Да слоў віншаванняў далучыўся і старшыня райкама прафсаюза работнікаў АПК Віктар Ставер. Ён адзначыў, што для кожнага з нас мама — галоўны чалавек у жыцці. Сярод шматлікіх свят, якія адзначаюцца ў нашай краіне, Дзень маці займае асаблівае месца. Гэта свята, да якога ніхто не можа застацца абыякавым. Ён пажадаў жанчынам, якія ўмела спалучалі выкананне працоўных абавязкаў з выхаваннем дзяцей і вядзеннем хатняй гаспадаркі, моцнага здароўя і па сапраўднаму залатой пары ў жыцці.
Акрамя таго, Віктар Ставер выказаў словы ўдзячнасці кіраўніцтву КСУП “Ніва-Барсукі” за право-
дзімую пастаянную работу па паляпшэнні ўмоў працы і адпачынку работнікаў сельгаспрадпрыемства, уважлівае стаўленне да сваіх ветэранаў. “Без мінулага — няма будучыні”, таму такія сустрэчы — цудоўная магчымасць у каторы раз выказаць словы ўдзячнасці лю­дзям, прысвяціўшым у свой час жыццё развіццю і фінансаваму ўмацаванню аграпрамысловага комплексу раёна, адзначыў ён.
Іван Рыняк і Віктар Ставер уручылі ветэранам працы, мнага­дзетным маці, якія адпрацавалі ў сельгас­арганізацыі не адзін дзясятак гадоў, кветкі і каштоўныя падарункі. Сярод адзначаных: Ганна Рыняк, Кацярына Лебедзева, Ніна Гушчына, Мікалай Бандарэнка, Рыгор Петранкоў, Іван Багамолаў, Кацярына Лебедзева, Кацярына Семянчук, Ніна Ерамеева, Васіль Капцялоў.
Асаблівыя словы ўдзяч­насці прагучалі ў адрас былога кіраўніка сельгасарганізацыі Віктара Крэса. Менавіта Віктар Васільевіч захаваў і прымножыў усё тое лепшае, што стваралася рукамі працаўнікоў на працягу дзесяцігоддзяў.
Свае музычныя і танцавальныя нумары падарылі прысутным работнікі раённага Цэнтра культуры і вольнага часу, а таксама мясцовыя школьнікі.
За салодкім сталом ветэраны вытворчасці ўспаміналі гады сваёй маладосці, працоўныя будні на карысць развіцця і ўмацавання дабрабыту роднай гаспадаркі.
У сваю чаргу запрошаныя на мерапрыемства ветэраны выказалі шчырую ўдзячнасць сённяшняму кіраўніцтву сельгаспрадпрыемства за праяўляемыя клопат, увагу і падтрымку.
Людміла СЯМЁНАВА.
Фота аўтара.