З мэтай павышэння фінансавай граматнасці школьнікаў старшых класаў Галоўнае ўпраўленне Нацыянальнага банка і Міністэрства адукацыі Рэспублікі Беларусь штогод праводзяць рэспубліканскую алімпіяду. На мінулым тыдні на базе СШ №2 імя К.П.Арлоўскага прайшоў яе раённы этап. Аб гэтым рэдактару інтэрнет-рэсурса “Кіраўца” паведаміла загадчык раённага вучэбна-метадычнага кабінета аддзела адукацыі, спорту і турызму райвыканкама Наталля Букатая.
На Кіраўшчыне алімпіяда па фінансавай граматнасці праводзіцца з 2013 года пры ўдзеле прадстаўнікоў ААТ “АСБ Беларусбанк” і ААТ “Белаграпрамбанк”. Гэтае мерапрыемства вырашае задачы папулярызацыі ведаў у вобласці фінансаў, фарміравання ў вучяў практычных навыкаў выкарыстання фінансавых інструментаў для планавання бюджэту і накапленняў, развіцця фінансавай культуры і ўмацавання фінансавай дысцыпліны.
Сёлета ў алімпіядзе прынялі ўдзел 24 вучні з 9 ўстаноў агульнай сярэдняй адукацыі. 13 з іх удзельнічалі ў гэтых своеасаблівых спаборніцтвах і летась, што сведчыць аб настойлівасці школьнікаў, упэўненасці ў ведах. Рабяты павінны былі адказаць на 30 тэставых пытанняў і напісаць пяць прычын, чаму зберагаць — гэта важна.
Пры падвядзенні вынікаў вызначыліся пераможца і прызёры. Дыпломы І і ІІ ступеняў заваявалі вучні СШ №2 імя К.П.Арлоўскага: Дзіяна Сарока і Яўген Цішкоў адпаведна. 3 месца ў алімпіядзе заняў Антон Бурко з Дабаснянскага НПК ДС-СШ. Дыпломы і падарункі ім уручылі дырэктар ЦБП №709 г.Кіраўска філіяла №703 ААТ “ААБ Беларусбанк” г.Бабруйска Алена Лявіцкая і намеснік РКЦ №17 у г.Кіраўску філіяла ААТ “Белаграпрамбанк” Наталля Юрасёва. Заахвочаны падарункамі былі таксама вучаніца СШ №1 Вера Лось і Дзмітрый Кірычэнка з СШ №2 імя К.П.Арлоўскага.
Трэба
адзна­чыць, што ў СШ №2 імя К.П.Арлоўскага фінансавай граматнасці вучняў надаецца належная ўвага. І, як вынік, — высокія іх дасягненні. Так, у розныя гады на абласным этапе рэс­публіканскай алімпіяды дастойныя вынікі паказвалі Кірыл Дрозд, Аліна Чайка, Аляксандра Костка. У 2015 г. Павел Хурсаў заняў 2 месца на абласным этапе, а летась стаў пераможцам і абараняў гонар Магілёўшчыны на рэс­публіканскім этапе.
Пераможца і прызёры раённага этапа алімпіяды прымуць удзел у абласным этапе, які адбудзецца 17 лістапада. Пажадаем ім поспехаў!