У Паўлавіцкім яслях-садку адбыўся конкурс “Міс Яслі-сад” — аб гэтым расказала выхавальнік установы адукацыі Вікторыя Прыгажаева:

— Нягледзячы на зіму, нядаўнія дзянькі у нашым яслях-садку выдаліся цёплымі і яскравымі ад усмешак маленькіх прыгажунь і іх эмацыянальных матуль. Трэба сказаць, што з 22 выхаванцаў ясляў-садка — 14 дзяўчынак, маленькіх прынцэс. Таму і прапанову правесці конкурс “Міс Яслі-сад” усе ўспрынялі з энтузіязмам. Рыхтаваліся адказна і рупліва.
І вось настаў хвалюючы дзень… Удзельніц чакалі складаныя выпрабаванні, у якіх іх самааддана падтрымлівалі любячыя матулі. У конкурсе “Час Славы” дзяўчынкі прадэманстравалі журы свае таленты: песні, танцы, мініяцюры. У “Інтэлектуальным конкурсе” ўдзельніцы адказвалі на мудрагелістыя пытанні. У выпрабаванні “Чытальнікаў” прыгажунькі дэкламавалі любімыя вершы. “Дэфіле” ўразіла ўсіх прысутных: з дарослай грацыёзнасцю дзяўчынкі дэманстравалі капялюшыкі, зробленыя таленавітымі рукамі сваіх матуль. У “Кулінарным паядынку” канкурсанткі прадставілі салодкія прысмакі, якія зрабілі з мамінай дапамогай. Які быў водар!
Ці трэба казаць, што ўвесь конкурс суправаджаўся ўсмешкамі, хваляваннямі і толькі пазітыўнымі эмоцыямі?!
У намінацыі “Міс Артыстызм” перамагла Насця Кандраценка, тытул “Міс Пяшчота” заваявала Вара Шчыглова, “Міс Талент” — Вераніка Кандраценка. Галоўны прыз і тытул “Міс Яслі-сад” журы прысудзіла Аляксандры Голікавай.