Жыць клопатамі людзей — менавіта з такім дэвізам ажыццяўляе сваю працоўную дзейнасць старшыня Дабаснянскага сельскага Савета дэпутатаў, дэпутат раённага і сельскага Саветаў дэпутатаў па Жыліцкай выбарчай акрузе №30 Галіна ШЧУР. Мы папрасілі Галіну Піліпаўну падзяліцца прынцыпамі ў рабоце:

— Сельвыканкам часцей за ўсё з’яўляецца першай інстанцыяй, куды звяртаюцца людзі за вырашэннем хвалюючых іх пытанняў. І гэта правільна. Пражываючы і працуючы на вёсцы, я ведаю клопаты сяльчан, ведаю, што ім жыццёва неабходна, а што рабіць не мае сэнсу. Напрыклад, у аддаленыя вёскі, дзе пражываюць два-тры чалавекі, ніхто не будзе весці водаправод ці пракладваць асфальт, але ніхто і не пакіне гэтых лю­дзей сам-насам са сваімі праблемамі. І да аднаго жыхара населенага пункта будзе прыязджаць аўталаўка, наведае яго, калі трэба, медыцынскі і сацыяльны работнік. Не застаюцца такія людзі і па-за ўвагай сельвыканкама.
Асноўны клопат — рэалізацыя мерапрыемстваў, накіраваных на добра­ўпарадкаванне населеных пунктаў, падтрыманне іх у належным санітарным стане. Шмат увагі надаецца выяўленню пустуючых і безгаспадарных дамоў, прывядзенню прылягаючых да іх тэрыторый у належны стан, зносу пабудоў якія псуюць агульны выгляд нашага сельсавета.
У зоне пастаяннай увагі — работа па выдаленні старых і прадстаўляючых пагрозу дрэў. Так, у аг.Добасна ў мясцовай славутасці — бярозавым гаі — выдалена больш за 100 сухіх і аварыйных дрэў, вясной тут плануецца правесці работы па пасадцы маладых саджанцаў. Больш за 20 дрэў было спілавана на могілках у в.Харлапавічы, на вуліцах в.Пархімкавічы. Увогуле, сёлета на добраўпарадкаванне населеных пунктаў сельсавета зрасходавана больш за 11100 рублёў.
Падтрымліваюцца ў належным стане брацкія магілы, пахаванні воінаў і партызан, абеліскі.
Важнае значэнне надаецца рабоце па рэгуляванні зямельных адносін, уцягненні ў севазварот невыкарыстоўваемых участкаў. Сёлета ў ААТ “Дабаснянскае” і КСУП “Жылічы” перададзена 70 га
такіх плошчаў. Дзякуючы калектыву КСУП “Жылічы” ў вёсках Скубяціна, Баркі, Чырвоны Беражок хмызнякі і пустазелле ператварыліся ў прыдатныя для сяўбы землі.
Зараз на тэрыторыі нашага сельсавета разгарнуліся работы па падрыхтоўцы да свята працаўнікоў вёскі “Дажынкі-2018”, гонар прымаць яговыпаў нашаму Жыліцкаму краю. Напрыклад, у аг.Добасна ўжо ўстаноўлена больш за 620 м плоту, 125 м — у Жылічах, тут жа заменена больш за 100 пліт жалезабетоннай агароджы.
Мэтанакіравана працуем па забеспячэнні супрацьпажарнай бяспекі жылых дамоў, аб’ектаў сацыяльна-бытавога і вытворчага прызначэння. Агляднай камісіяй сёлета абследавана 580 домаўладанняў па пытаннях пажарнай бяспекі. Значную работу па прафілактыкі пажараў праводзяць супрацоўнік МНС Расціслаў Ставер і спецыяліст па сацыяльнай рабоце Надзея Курбацкая. У выніку ўсе выяўленыя недахопы ў жылых памяшканнях мнагадзетных сем’яў, сем’яў, дзе дзеці знаходзяцца ў сацыяльна небяспечным становішчы, адзінока пражываючых грамадзян тэрмінова ўхіляюцца, праводзяцца паўторныя праверкі.
Штомесяц у сельвыканкам з РАУС паступае інфармацыя аб жыхарах нашага сельсавета, якія ўчынілі правапарушэнні або злачынствы. І тут часцей за ўсё на першы план выходзіць праблема п’янства: у стане алкагольнага ап’янення знаходзіўся ў грамадскім месцы або на працы, учыніў скандал ці крадзеж…
Як старшыня савета грамадскага пункта аховы правапарадку, наведваю правапарушальнікаў дома, размаўляю з імі ці іх роднымі, з кіраўніцтвам на рабочым месцы, калі чалавек працуе. Многія выпраўляюць свае паводзіны, мяняюць асацыяльны лад жыцця.
Ёсць і тыя, хто нідзе не працуе і не жадае працаваць. Добра, калі кормяцца за кошт таго, што “ў сезон” збіраюць грыбы і ягады, дапамагаюць па гаспадарцы вяскоўцам. Але, на жаль, некаторыя жывуць за кошт пенсій бацькоў: маўляў, навошта сябе абцяжарваць працай, калі маці заўсёды пашкадуе шалапутнага сыночка ці дачку.
Асаблівы клопат — пра сем’і з дзецьмі, дзе бацькі злоўжываюць спіртным. У такіх гаспадароў работнікі сельвыканкама — частыя госці. Наведваюцца ра­зам з камісіямі і паасобку медыцынскія і педагагічныя работнікі, супрацоўнікі МНС і РАУС. Адным словам, задзейнічаны ўсе без выключэння.
На належным узроўні наладжана работа са зваротамі грамадзян. У сельвыканкаме аформлены інфармацыйныя стэнды і матэрыялы па зваротах, у поўным аб’ёме прадстаўлена інфармацыя па прынцыпе “адно акно” з указаннем пераліку аказваемых паслуг. Добра зарэкамендавалі сябе выязныя прыёмы грамадзян, сустрэчы з насельніцтвам па месцы жыхарства, падчас якіх узнімаюцца пытанні, якія хвалююць сяльчан. Многія вырашаюцца адразу, патрабуючыя больш дэталёвага разгляду — бяруцца на кантроль.
Для мяне, як старшыні сельвыканкама і дэпутата, забеспячэнне жыццядзейнасці насельніцтва — асноўная задача. У сваёй штодзённай рабоце абапіраюся на дапамогу стараст, дэпутатаў сельскіх Саветаў дэпутатаў (іх выбрана 16 чалавек), якія прымаюць актыўны ўдзел ва ўсіх праводзімых мерапрыемствах, а таксама з’яўляюцца звязуючым звяном паміж сяльчанамі і ўладай. Яны і сходы грамадзян арганізуюць, і ў пытаннях навядзення парадку ў вёсках — першыя памочнікі. Дзякуючы іх настойлівасці, неабыякасці да людскіх праблем многія пытанні вяскоўцаў вырашаюцца своечасова і станоўча. Так сказаць, працуем на апярэджанне. Вельмі ўдзячная за падказкі, прапановы старастам — Галіне Пінчук, Міхаілу Глазкову, Наталлі Швядоўскай, Мікалаю Карнееву і іншым. Дарэчы, Мікалай Мікітавіч разам з аднавяскоўцамі сабралі грошы, набылі фарбу і пакрасілі плот на могілках в.Даброціна. Упэўнена, што ўсе разам мы здольныя зрабіць наш сельсавет больш прыгожым, а жыццё яго жыхароў — камфортным.
Запісала Людміла СЯМЁНАВА.