“Акадэмія мужнасці” выяўляла мацнейшых сярод моладзі Кіраўшчыны
Спартакіяда для ўдзельнікаў маладзёжных атрадаў аховы правапарадку “Акадэмія мужнасці” стала адным са значных мерапрыемстваў райкама ГА “БРСМ” у адышоўшым годзе.
Рух маладзёжных атрадаў аховы правапарадку (МААП) ГА “БРСМ” аб’ядноўвае больш як 15,5 тысячы юнакоў і дзяўчат ва ўсіх рэгіёнах Беларусі. Ён накіраваны на падрыхтоўку маладых людзей да службы ў арміі, паступлення ва ўстановы вышэйшай адукацыі сілавых структур. Яго ўдзельнікі актыўна дапамагаюць супрацоўнікам праваахоўных органаў і выратавальнікам у забеспячэнні грамадскага правапарадку і навучанню грамадзян асновам бяспекі жыццядзейнасці.
На базе філіяла “Кіраўскі прафесійны ліцэй” Жыліцкага сельгаскаледжа адбыўся раённы этап рэспубліканскага конкурсу “Акадэмія мужнасці”. Удзел у ім прынялі 4 каманды ва ўзроставай катэгорыі ад 14 да 31 года: “Ветразь” (Жыліцкі сельгаскаледж), “Страла” (філіял сельгаскаледжа), “Молат” (СШ №1) і “Альфа” (СШ №2 імя К.П.Арлоўскага).
Праграма ўключала ў сябе праверку тэарэтычных ведаў, а таксама спартыўныя спаборніцтвы па перацягванні каната, падняцці гіры, чаўночным бегу, стральбе з пнеўматычнай вінтоўкі. Па выніках выпрабаванняў былі вызначаны пераможцы і прызёры ў камандным і асабістым заліках.
У стральбе самым меткім стаў Станіслаў Лапцеў з СШ №1, 2 і 3 месцы раздзялілі паміж сабой прадстаўнікі СШ №2 імя К.П.Арлоўскага Уладзіслаў Іваноў і Анастасія Савельева.
Уладзімір Сцяпанаў і Ірына Цітова (абодва з Жыліцкага сельгаскалежда) прадэманстравалі лепшыя вынікі падчас правядзення спаборніцтваў па чаўночным бегу.
Самымі дужымі і выносілівымі ў падняцці гіры сталі названы вышэй Уладзімір Сцяпанаў (1 месца), Павел Шпакаў з філіяла сельгаскаледжа (2 месца) і Ілья Варанцоў з СШ №2 імя К.П.Арлоўскага (3 месца).
У агульнакамандным заліку прызавыя месцы размеркаваліся наступным чынам: 1 і 2 месцы падзялілі паміж сабой каманды з Жыліцкага сельгаскаледжа і яго філіяла, адпаведна 3 месца — на рахунку прадстаўнікоў з СШ №1.
Ацэньвала вынікі спартакіяды кампетэнтнае журы, у састаў якога ўвайшлі намеснік начальніка РАНС Андрэй Архіпаў і старшы дзяржінспектар АДАІ РАУС Аляксандр Кавалёў.
Пераможцы былі ўзнагароджаны дыпломамі і прызамі.