З цеплынёй і шчырасцю
У аддзяленне кругласутачнага знаходжання для пажылых грамадзян і інвалідаў в.Хвайніца РЦСАН напярэдадні Новага года з віншаваннямі завіталі да яго насельнікаў прадстаўнікі раённай улады — першы намеснік старшыні райвыканкама Іван Барташэвіч, старшыня раённага Савета дэпутатаў Галіна Слабоднікава і намеснік старшыні райвыканкама Таццяна Бяляўская.
Ад імя райвыканкама госці павіншавалі прысутных з навагоднімі святамі, пажадалі моцнага здароўя і добрага настрою.
Загадчыку аддзялення Анатолю Рышкевічу Галіна Слабоднікава перадала карысныя падарункі, якімі з задавальненнем будуць карыстацца жыльцы аддзялення, таксама кожны з пажылых грамадзян атрымаў салодкасці.
Насельнікі аддзялення падзяквалі шаноўным гасцям і таксама ўручылі ім прыгожыя сувеніры ў выглядзе ёлачак, зробленых уласнымі рукамі, якія будуць нагадваць аб гэтай сустрэчы.
Пасля адбылася азнаямляльная экскурсія, падчас якой кіраўнік РЦСАН Вольга Мержый расказала пра жыхароў аддзялення, паказала, як яны жывуць. Госці пабывалі ў палаце для ветэранаў, наведалі ляжачых насельнікаў, зазірнулі на кухню і ў сталовую.
Прадстаўнікоў раённай улады задаволілі належныя ўмовы жыцця пажылых грамадзян, бо клопат аб старэйшых — адзін з галоўных абавязкаў грамадства. Ганаровыя госці пажадалі кіраўніцтву, персаналу аддзялення кругласутачнага знаходжання для пажылых грамадзян і інвалідаў у будучым годзе поспехаў і дабрабыту.
Юлія Завішава.
Фота
Максіма Мікешына.