21 лютага сваё прафесійнае свята адзначаюць работнікі адной са старэйшых службаў Беларусі. Першыя дакументальныя сведчанні аб дзяржаўных зямельных актах, якія называлі ездакамі, адносяцца да 1398 года. Ужо тады беларусы мералі зямлю і займаліся складаннем карт. 

Як бы ні мяняўся час, прадстаўнікі гэтай прафесіі былі і будуць запатрабаваны заўсёды. Збіраецеся вы пабудаваць дом або хочаце яго прадаць, усталяваць мяжы ўчастка, правесці тэлефон або газ — без удзелу землеўпарадчыкаў проста не абысціся.
Напярэдадні прафесійнага свята мы сустрэліся з начальнікам землеўпарадкавальнай службы райвыканкама Андрэем ШЧЭРБІЧАМ і папрасілі расказаць аб асноўных напрамках дзейнасці іх невялікага калектыву.
— Работнікі нашай службы, а калектыў наш складаецца ўсяго з трох чалавек, займаюцца кантролем за выкарыстаннем і аховай земляў, разглядам матэрыялаў па прадастаўленні і канфіскацыі зямельных участкаў, выяўленнем невыкарыстоўваемых або нерацыя­нальна выкарыстоўваемых земляў, выконваем і шэраг іншых функцый па ахове земляў на тэрыторыі раёна. Імкнемся да таго, каб кожны ўчастак зямлі выкарыстоўваўся і прыносіў карысць.
Летась у нашу службу паступіла 485 заяў па пытаннях прадастаўлення і канфіскацыі зямельных участкаў, з іх 89 — ад юрыдычных асоб. Земслужбай сфарміравана база дадзеных аб свабодных зямельных участках, якія могуць быць выкарыстаны для індывідуальнага жыллёвага будаўніцтва. Для зручнасці кліентаў уся інфармацыя аб іх размешчана на стэндах, а таксама на афіцыйным сайце райвыканкама. Да слова, у раёне заўсёды маюцца ў наяўнасці свабодныя ўчасткі для рознага мэтавага прызначэння.
У мінулым годзе 5 грама­дзян выказалі жаданне ўзяць зямельныя ўчасткі, 2 з іх — з ліку маючых патрэбу ў паляпшэнні жыллёвых умоў.
З мэтай паляпшэння абслугоўвання жыхароў сельскіх населеных пунктаў за кожным сельсаветам замацаваны работнікі земслужбы, якія рэгулярна туды выязджаюць, праводзяць прыём грамадзян па пытаннях, якія тычацца зямельных адносін.
У адпаведнасці з даручэннямі прэм’ер-міністра Беларусі да
1 студзеня 2017 г. сельгасарганізацыі краіны павінны былі завяршыць работу па рэгістрацыі земляў, прадастаўленых ім для вядзення сельскай гаспадаркі. На Кіраўшчыне з пастаўленай задачай усе справіліся своечасова.
У нашым раёне налічваецца 13 сялянска-фермерскіх гаспадарак, у карыстанні якіх знаходіцца 505 га земляў. Летась СФГ “Вясёлы малочнік” згодна рашэння райвыканкама было выдзелена дадаткова 17,5 га.
Сумесна з сельвыканкамамі значная ўвага надаецца рабоце па ўцягненні ў сельгас­абарот невыкарыстоўваемых зямельных ўчасткаў. Право­дзяцца абкошванне пустазелля, выдаленне шматгадовых насаджэнняў і хмызняку, знос пустуючых дамоў. У мінулым годзе дзякуючы гэтым мерам сельгасарганізацыямі раёна ў севаабарот быў уцягнуты 491 га невыкарыстоўваемых раней земляў. Сёлета гэта работа будзе актывізавана.
Нягледзячы на праводімую
работу па-ранейшаму выяўляюцца факты неэфектыўнага выкарыстання земляў, прадастаўленых грамадзянам як для будаўніцтва і абслугоўвання жылога дома, так і для вядзення асабістай падсобнай гаспадаркі. У мінулым годзе землеўпарадкавальнай службай было праве­дзена 713 праверак па захаванні зямельнага заканадаўства. Як вынік — 30 фізічных і 4 юрыдычных асобы былі прыцягнуты да адміністрацыйнай адказнасці, агульная сума штрафаў склала 2794,50 рубля. Сярод асноўных парушэнняў — несвоечасовае заняцце і вяртанне прадастаўленых зямельных участкаў, невыкананне патрабаванняў па іх ахове.
Мяркую, што бягучы год, які ў нашай краіне абвешчаны Годам малой радзімы, стане добрым стымулам для таго, каб больш актыўна працаваць над павышэннем культуры земляробства і гаспадарскіх адносін да зямлі. Кожны з нас, пражываючы ў сваім населеным пункце, павінен задацца пытаннем: што я магу зрабіць для свайго любага сэрцу куточка зямлі, каб ён быў чыстым, дагледжаным, квітнеючым? Адказ вельмі просты — трэба прыкласці пэўныя намаганні, фізічныя або фінансавыя. Калі перастаць патрабаваць і змяніць пазіцыю “нам усе павінны” на “мы зробім разам”, пачаць з сябе і сваіх блізкіх, справа пойдзе хутчэй. Чаму б не аб’яднацца дзеля навядзення чысціні і парадку ў сваёй вёсцы? Напрыклад, абвясціць суботнік і талакой пазбавіцца несанкцыянаваных звалак, хмызняку ці пустазелля. У большасці сваёй людзі з задавальненнем адгукаюцца на такія ініцыятывы, падтрымліваюць іх.
Сёлета, у Год малой радзімы, у раёне запланаваны шэраг мерапрыемстваў па кантролі за мэтавым выкарыстанням земляў, далейшым уцягненні ў севаабарот невыкарыстоўваемых участкаў.
Адной з асноўных задач беларускіх землеўпарадчыкаў з’яўляецца работа па прапагандзе нацыянальных каштоўнасцей — навучыць цаніць і берагчы сваю родную зямлю, правільна арганізоўваць яе прыродавыкарыстанне, каб захаваць яе квітнеючай на стагоддзі для наступных пакаленняў.
Падрыхтавала Людміла СЯМЁНАВА.