Сёлетні год для аператара машыннага даення КСУП “Жылічы” Ніны Ляўковіч вельмі знакавы. На грудзях жанчыны, акрамя медаля “За працоўныя заслугі”, заззяў ордэн Пашаны, які 9 лютага бягучага года ёй уручыў Прэзідэнт Беларусі Аляксандр Лукашэнка на ўрачыстай цырымоніі ўручэння дзяржаўных узнагарод лепшым работнікам аграрнай галіны краіны.

У галіне жывёлагадоўлі Ніна Ляўковіч ужо больш за 25 гадоў. Яна — адна з лепшых даярак сваёй гаспадаркі і раёна.
Нарадзілася і вырасла жанчына ў в.Свіслач Асіповіцкага раёна. Пасля заканчэння васьмігодкі паступіла ў Жыліцкі сельгаскаледж, спасцігала навуку агароднінаводства. Падчас вучобы пазнаёмілася з мясцовым юнаком, і праз некаторы час маладыя згулялі вяселле. У свой час кіраўніцтва гаспадаркі, дзе працавалі Ляўковічы, выдзеліла сям’і добраўпарадкаваную кватэру.
Сваю работу Ніна Дзмітрыеўна вельмі любіць і атрымлівае ад яе сапраўднае задавальненне. Штодня яна спяшаецца на сваё працоўнае месца, бо падапечныя, а гэта 45 рагуль, вельмі яе чакаюць. Спецыфіка работы аператараў машыннага даення кароў у малакаправод мае на ўвазе больш цесны кантакт з жывёлай, чым у даільных залах. Да кожнай з іх у даяркі свой падыход. Па словах жанчыны, па-іншаму і нельга, кожная жывёліна — са сваім характарам: з іншай, пакуль не паразмаўляеш, не пагладзіш яе, падаіць не атрымаецца. Клопат пра жывёлу ў перадавой даяркі — ад матулі, якая ўсё сваё жыццё прысвяціла жывёлагадоўлі і заўсёды была ў ліку лепшых, працавала шчыра, адказна і самааддана.
Немалаважным фактарам высокіх надояў перадавы аператар лічыць менавіта строгае захаванне рацыёну кармлення жывёлы і кантроль за яе здароўем. Але самае галоўнае — хварэць душой за справу, якой займаешся.
Нездарма падчас нядаўняга справаздачнага сходу па падвядзенні вынікаў работы за 2017 год дырэктар КСУП “Жылічы” Міхаіл Агафонаў прывёў прыклады таго, што пры аднолькавай кармавой базе, генетычным патэнцыяле жывёлы і ўмовах яе ўтрымання, вынікі па надоях малака ад каровы на кожнай ферме розныя. А гэта значыць, што стаўленне работнікаў да сваіх працоўных абавязкаў адыгрываюць немалаважную ролю ў дасягненні высокіх вытворчых паказчыкаў.
З пачатку года ад кожнай каровы сваёй групы Ніна Ляўковіч надаіла па 1148 кг малака (па сель-
гас­прадпрыемстве сярэдні паказчык — 939 кг).
Даярцы не аднойчы даводзілася прадстаўляць сваё сельгаспрадпрыемства на раённых спаборніцтвах на лепшага аператара машыннага даення, прымала ўдзел і ў абласных. У яе скарбонцы нямала дыпломаў і Ганаровых грамат самых розных узроўняў, якія пацвярджаюць высокую адказнасць і прафесіяналізм працаўніцы.
Ніна Дзмітрыеўна — добразычлівая і ветлівая жанчына, заўсёды жыве ў згодзе з калектывам і аднавяскоўцамі, нікому не адмаўляе ў падтрымцы ці дапамозе.
Надзейнай апорай для яе ў любой справе з’яўляецца сям’я: муж Віктар Андрэевіч і дачка Юлія. Гаспадар працуе ў сельгаспрадпрыемстве механізатарам. Як і жонка, ён — старанны і адказны работнік. Бацькі выхавалі добрую дачку, зараз шчаслівыя бабуля з дзядулям радуюцца гадавалай ўнучцы.
За плячыма Н.Д.Ляўковіч — багаты працоўны вопыт, дастойныя вынікі работы, а наперадзе — новыя рубяжы. І яны абавязкова ёй скарацца, бо працавітасці і стараннасці ў яе шмат!
Людміла СЯМЁНАВА.