Кіраўчане — у ліку пераможцаў абласнога спартыўнага фестывалю сем’яў
“Тата, мама, я — здаровая сям’я!” — пад такой назвай у Магілёве праводзіўся абласны спартыўны фестываль з удзелам сем’яў Прыдняпроўскага краю. Мерапрыемства было прымеркавана да Міжнароднага дня сям’і. Сама назва фестывалю гаворыць сама за сябе: гэта было сапраўднае свята сямейнай любові, гармоніі ў цеснай сувязі з фізічнай культурай і спортам, а, значыць, здароўем.
Удзел у спартыўных спаборніцтвах прынялі 11 каманд з Магілёва і раёнаў вобласці. Кіраўшчыну прадстаўлялі дзве сям’і з райцэнтра. У састаў сям’і Пішчаліных увайшлі тата і мама Яўген і Вольга і іх сыны — 10-гадовы Мікіта і 5-гадовы Яраслаў. Сям’ю Наўрозавых прадстаўлялі тата Валерый, мама Марына і іх сыны — 14-гадовы Даніла і 8-гадовы Міхаіл.
Дзеці спаборнічалі ў розных узроставых катэгорыях: малодшай (6-8 гадоў), сярэдняй (9-11 гадоў) і старэйшай (12-14 гадоў). Іх бацькі выконвалі свае заданні, а таксама ў асобных конкурсах выступалі разам з дзецьмі адной камандай. Пры падвядзенні вынікаў суміраваліся рэзультаты па ўсіх конкурсах і ацэньвалася выступленне сям’і ў цэлым.
У праграме для мам былі наступныя заданні: згібанне і разгібанне рук ва ўпоры лежачы, скачок у даўжыню з месца, стральба з пнеўматычнай вінтоўкі. Татам патрэбна было падцягнуцца на высокай перакладзіне, таксама страляць з пнеўматычнай зброі і паспрачацца ў дартсе. Дзеці выяўлялі мацнейшых у фігурным ваджэнні на самакаце, чалночным бегу і кіданні мяча. Акрамя таго, для ўсіх была наладжана сямейная эстафета, а для дзяцей старэйшай узроставай групы ў праграму быў уключаны стрытбол, зразумела, з удзелам бацькоў.
Нашы сямейныя каманды і іх асобныя прадстаўнікі прадэманстравалі выдатныя фізічныя здольнасці, паказалі, што сябруюць са спортам пастаянна і даказалі, што па праву могуць лічыцца сапраўдным здаровымі сем’ямі. Ва ўсіх трох узроставых групах удзельнікі з Кіраўшчыны не пакінулі шанцаў сапернікам і занялі першыя месцы! У малодшай і сярэдняй узроставых групах перамогу святкавала сям’я Пішчаліных, у старэйшай — перамагла сям’я Наўрозавых.
Выдатна праявілі сябе нашы прадстаўнікі ў асобных відах. Даніла Наўрозаў у двух з іх быў першым, акрамя аднаго, дзе заняў 2 месца. Мікіта Пішчалін першынстваваў абсалютна ва ўсіх відах, Яўген Пішчалін заняў два першых месцы і адно другое, Марына Наўрозава стала пераможцай у стральбе, Вольга Пішчаліна заняла другія месцы ва ўсіх відах, прызавыя месцы заваявалі і малодшыя ўдзельнікі. Карацей, усе выступілі — на “ўра”!
Лепшыя сем’і фестывалю запрошаны на рэспубліканскі фестываль “Тата, мама, я — здаровая сям’я!’, які 9-10 чэрвеня будзе праходзіць у Пінску.
Аляксандр ХАХЛОЎ.