КСУП «Чырвоны баец»: з прыцэлам на высокі рэзультат

Чарговы важнейшы этап работ— перыяд нарыхтоўкі кармоў для грамадскага пагалоўя жывёлы захапіў сяльчан. І калі астатнія не такія працяглыя, хоць і не менш важныя, корманарыхтоўка пачынаецца яшчэ вясной, а доўжыцца да глыбокай восені. Адсюль і задачы стаяць глабальныя: забяспечыць за кошт агранаміі і механізацыі іншую галіну — жывёлагадоўлю, якая круглы год з’яўляецца крыніцай папаўнення грамадскай касы.

Баец-2

Механізатар Аляксандр Муха

Заўчора ўключыліся ў працэс корманарыхтоўкі земляробы КСУП “Чырвоны баец”. Хутка, як кажуць, “прыстраляліся”, апрабавалі загадзя пад­рыхтаваныя машыны і сельгасагрэгаты, і справа пайшла зладжана і рытмічна, як гэта звычайна і бывае ў сельспрадпрыемстве.

Траву скошваюць з дапамогай дзвюх касілак. Дзяніс Казанцаў працуе з навясной GMD-800, Яўген Кандраценка — з прычапной КПП-3,5.
Выдатна зарэкамендавалі сябе ў рабоце ў мінулыя гады граблі “Millenium”, з дапамогай якіх механізатар Аляксандр Муха збірае скошаную масу ў валкі для правяльвання.
Далей у дзеянне на ўчастках, дзе былі праве­дзены папярэднія работы, уключаецца падборшчык КВК-800. Віталь Бяляўскі здрабняе на ім сянажную масу, якая адпраўляецца да месцаў складзіравання.
Адвозку масы забяспечвае цэлы атрад з вопытных “байцоў”: на МАЗах — Аляксандр Ермалаеў, Віктар Сенчукоў, Мікалай Аляксееў, на трактарах МТЗ з ПІМамі — Уладзімір Бяляўскі і Аляксандр Масюковіч.
Трамбуюць сянажную масу ў дзве змены. На К-700 змяняюць адзін аднаго Валерый Дырыкаў і Юрый Манетаў. Закладка праходзіць з захаваннем усіх тэхналагічных норм, з прымяненнем кансервантаў. За гэтым працэсам уважліва сочаць адказныя асобы, у ліку якіх галоўны заатэхнік і галоўны аграном гаспадаркі.

Баец-1

Механізатар Віталь Бяляўскі

Яшчэ адзін вельмі важны агрэгат у гаспадарцы падчас касавіцы — прэс-падборшчык-упакоўшчык “Krone”. Прычэплены ён да трактара, кіруе якім Віктар Аляксееў. Універсальную тэхніку можна выкарыстоўваць у залежнасці ад характару нарыхтоўкі: выдатна падыходзіць для скатвання і саломы, і сена, і сенажу. Можна — у сетку, а можна — у палімерную ўпакоўку. Менавіта апошнім спосабам паралельна з трамбоўкай у траншэі вядзецца нарыхтоўка сенажу. Ужо некалькі апошніх гадоў у гаспадарцы практыкуюць такую нарыхтоўку, і гэта апраўдвае сябе: корм добра захоўваецца.

Баец-3

Скошаная маса зграбаецца ў валкі для правяльвання

Як адзначыў у размове старшыня сельгаспрадпрыемства Сяргей Лянкевіч, для таго, каб згодна плана забяспечыць паўтарагадовы запас кармоў, а гэта па 33,1 ц.к.адз. на ўмоўную галаву жывёлы, сёлета працаўнікам “Чыр­вонага байца” патрэбна назапасіць 5300 т сенажу, 400 т сена і 12000 т сіласу. Укосная плошча ў гаспадарцы складае 1130 га, з якіх 822 га — лугавыя і 308 га — шматгадовыя травы.

Баец-5

Механізатар Віктар Аляксееў

Травастой, адзначыў кіраўнік, выдаўся неблагі. Асабліва радуюць люцэрна, канюшына. Павялічылі апошнім часам плошчы пад зернебабовыя, каб збалансаваць кармы па ўтрыманні бялку. Першым укосам у гаспадарцы плануюць нарыхтаваць 360 т сена і 4140 т сенажу. Адметна, што 1500 т сянажнай масы будзе закансер­вавана ў палімерную ўпакоўку.

Баец-4

Закладка сянажнай масы ў траншэю

Дарэчы, у “Чырвоным бай­цы” кармы нездарма нарыхтоўваюць з запасам. Як мы даведаліся ад старшыні КСУП, пакуль будзе праходзіць нарыхтоўка кармоў новага ўраджаю, для жывёлы маецца ўдосталь леташніх: яшчэ 4 тыс.т закансерваванай масы паступова выкарыстоў­ваюцца ў цяперашні час, чым забяспечваецца паў­нацэнны рацыён жывёлы.
Аляксандр ХАХЛОЎ.
Фота аўтара.

Добавить комментарий

Ваш адрес email не будет опубликован.