Васіль Фядотаў з КСУП “Барчыцы-агра” — “сярэбраны” прызёр абласнога конкурсу

У Горках на базе Беларускай дзяржаўнай сельгасакадэміі прайшоў абласны конкурс аператараў па штучным асемяненні буйной рагатай жывёлы. Прадстаўнікі нашага раёна вярнуліся з яго з цэлай калекцыяй узнагарод.

Гонар Кіраўшчыны абаранялі пераможца сёлетняга раённага конкурсу Юлія Пархімчык з КСУП “Чырвоны баец” і “сярэбраны” прызёр Васіль Фядотаў з КСУП “Барчыцы-агра”.

Трэба адзначыць, што абодва тэхнікі-асемянатары ўжо не аднойчы выступалі на абласных конкурсах і заўсёды паказвалі высокія прафесійныя рэзультаты. Не сталі выключэннем і сёлетнія спаборніцтвы.

Пасля ўдзелу ў некалькіх этапах конкурсу Васіль Фядотаў заваяваў другое месца сярод удзельнікаў з усіх раёнаў вобласці . Наш зямляк узнагароджаны Ганаровай граматай РУСВП “Магілёўскае дзяржплемпрадпрыемства”, а таксама каштоўным падарункам — халадзільнікам.

Ганаровай граматай была адзначана Юлія Пархімчык — за высокае прафесійнае майстэрства, адзін з самых лепшых рэзультатаў па выхадзе цялят на 100 галоў БРЖ — галоўны паказчык ў рабоце тэхніка-асемянатара. У якасці падарунка Юлія атрымала швейную машынку.

Акрамя канкурсантаў высока была ацэнена таксама работа начальніка філіяла па Кіраўскім раёне Магілёўскага дзяржплемпрадпрыемства Галіны Шкрабавай. Яна ўзнагароджана Ганаровай граматай за асабісты ўклад у развіццё племянной справы, Дыпломам за лепшую арганізацыю і правядзенне раённага конкурсу прафмайстэрства сярод аператараў па штучным асемяненні БРЖ, а таксама каштоўнымі падарункамі.

Юлія Пархімчык з КСУП “Чырвоны баец”

Начальнік філіяла па Кіраўскім раёне Магілёўскага дзяржплемпрадпрыемства Галіна Шкрабава