Мнагадзетныя сем’і ў Беларусі агорнуты клопатам і ўвагай дзяржавы. Яны атрымліваюць дапамогі і выплаты, ім выдзяляюцца льготныя крэдыты на будаўніцтва жылля, назначаецца сямейны капітал. Штогод да пачатку новага навучальнага года сем’ям выдзяляецца матэрыяльная дапамога.
Для кожнай маладой сям’і мець сваё жыллё — гэта самая запаветная мара і права, якое прапісана ва Усеагульнай дэкларацыі правоў чалавека. Магчымасцю з дапамогай дзяржавы пабудаваць жыллё і забяспечыць сябе і сваіх дзяцей камфортнымі ўмовамі жыцця скарысталіся Леанід і Наталля Садоўскія. У мінулым годзе іх мнагадзетная сям’я атрымала ключы ад кватэры ў пабудаваным шматпавярховым доме па вул.Гагарына.
Леанід і Наталля разам ужо 11 год, у сям’і падрастаюць трое цудоўных дзетак. Старэйшай Дашы хутка споўніцца 10 год, яе брацікам Андрэю і Арцёму адпаведна 7 і 3 года.
Як расказала Наталля, на ўлік маючых патрэбу ў паляпшэнні жыллёвых умоў яны сталі ў 2010 годзе: на той час сям’я жыла ў в.Чыгірынка, у іх падрастала дачушка. Калі дзетак стала трое, сям’я набыла статус мнагадзетнай, з’явілася магчымасць з дзяржаўнай дапамогай атрымаць кватэру ў Кіраўску, чым яны з радасцю і скарысталіся.
Галава сям’і працуе трактарыстам у ДРБУ-197, Наталля — поварам у СШ №1, іх дзеці наведваюць хто — школу, хто — дзіцячы садок. Бацькі імкнуцца агарнуць клопатам і ўвагай сваіх дзетак, зрабіць іх жыццё шчаслівым.