Суквецце талентаў і творчае натхненне — рэпартаж з творчай справаздачы Кіраўскага ЦДАДіМ

Па традыцыі, напрыканцы чарговага навучальнага года творчую справаздачу прадстаўляе калектыў педагогаў і навучэнцаў Цэнтра дададковай адукацыі дзяцей і моладзі г.Кіраўска. Не стаў выключэннем і гэты год. У раённым Цэнтры культуры і вольнага часу ўдзельнікі аб’яднанняў па інтарэсах паказалі, чаго дасягнулі і якіх поспехаў дабіліся.

Папярэднічалі справаздачнаму канцэрту, як і ў папярэднія гады, захапляльныя спаборніцтвы па картынгу. Іх удзельнікі ўспомнілі і ўшанавалі мінутай маўчання памяць былога педагога дадатковай адукацыі ЦДАДіМ Сяргея Маркевіча, які, на жаль, нядаўна пакінуў жыццё. Сяргей Васільевіч шмат зрабіў для развіцця аб’яднання мотааматараў і дзякуючы яго намаганням спаборніцтвы па картынгу сталі ў нашым раёне традыцыйнымі. Эстафету С.В.Маркевіча падхапіў Алег Цітарэнка, які зараз займаецца з рабятамі над шліфаваннем іх навыкаў ваджэння матацыкла і невялікіх гоначных аўтамабіляў.

У гэты раз пляцоўкай, дзе разгарнуліся спаборніцтва, упершыню стала плошча імя Кірава. А вось сапернікі у кіраўскіх гоншчыкаў засталіся тыя ж — добрыя сябры з Цэнтра дадатковай адукацыі дзяцей і моладзі г.Бабруйска, якія зноў прадаставілі для гонак свае машыны.  Спрачацца за званне мацнейшых у фігурным ваджэнні кіраўчанам, безумоўна, было не так лёгка — у бабруйчан усё ж больш вопыту і магчымасцей для трэніровак. І ў камандным заліку госці аказаліся мацнейшымі. Але канкурэнцыю нашы гоншчыкі аказалі дастойную і заваявалі некалькі прызавых месцаў у асабістым заліку. Так, ва ўзроставай катэгорыі 16-18 гадоў пераможцам стаў Максім Пуцікаў. А ў катэгорыі 13-15 гадоў увесь п’едэстал гонару аказаўся  “кіраўскім”: Арцём Костка, Сяргей Храмянкоў і Аляксандр Іваноў занялі адпаведна першае, другое і трэцяе месцы.

У фае Цэнтра культуры і вольнага часу свае творчыя работы дэманстравалі выхаванцы мастацкага профілю — школы эстэтычнага развіцця і аб’яднанняў па інтарэсах “Скарбніца” і “Умелыя ручкі”. Кіруюць імі Жанна Кунгер, Вольга Гушчына і Ганна Цвяткова.

Асноўныя ж дзеянні разгарнуліся ў глядзельная зале, якая практычна ўся была запоўнена. Сярод гасцей былі намеснікі старшыні райвыканкама Таццяна Бяляўская, Вячаслаў Нявінскі, начальнік аддзела па адукацыі, спорту і турызму райвыканкама Наталля Траццякова, ганаровы грамадзянін раёна Надзея Каранкевіч.

Справаздачны канцэрт, які меў назву “Наша творчасць — для вас!”, прайшоў з поспехам. Усе ўдзельнікі выдатна падрыхтаваліся, а іх нумары гледачы сустракалі дружнымі і шчырымі апладыспентамі.  Цікава, нават крэатыўна аб’яўлялі выступаючых вядучыя Мікіта Гушчын, Дар’я Ананіч, Ягор Басак і Сафія Бароўская.

Добры настрой прысутным стваралі вакалісты студыі “Смайл”, кіруе якой Максім Сокал. Цікавыя танцавальныя кампазіцыі падрыхтавалі ўдзельнікі аб’яднанняў па інтарэсах “Эдэльвейс”  і “Імпульс” (кіраўнікі адпаведна  Крысціна Караткевіч і Аніта Шчэрбіч). Танцамі ў ЦДАДіМ, дарэчы,  займаюцца прадстаўнікі самых розных узростаў — ад дашкольнікаў да дарослых.

Выдатныя навыкі рукапашнага бою прадэмастравалі хлопчыкі, якія наведваюць аб’яднанне па інтарэсах “Шчыт”. Кіраўнік Анатоль Сцепановіч вучыць рабят не толькі тэхнічным прыёмам, а і дапамагае стаць у будучым сапраўднымі мужчынамі, абаронцамі Айчыны.

Як заўсёды, парадавалі сваімі калекцыямі ўдзельнікі ўзорнай студыі юнага мадэльера “Жамчужына”. Пад кіраўніцтвам Эльвіры Перадня і Таццяны Рудак яны станавіліся неаднаразовымі пераможцамі і прызёрамі абласных і рэспубліканскіх конкурсаў, такіх, як “Млын моды”, “Блакітная пралеска”, “Творчасць без межаў”, “Залатое вераценца”  і іншых. Сёлета “Жамчужына” адзначае 10-гадовы юбілей, з нагоды чаго было праведзена асобнае, другое аддзяленне канцэрта. Яго вядучымі сталі кіраўнікі студыі, якія разам з выхаванцамі розных гадоў успомнілі на сцэне ўвесь творчы шлях студыі, прадэманстравалі калекцыі, якія запомніліся і палюбіліся гледачам: “Аранжавае лета”, “Натхненне”,, “Мелодыя ліній”, “Ванільныя зефіркі”, “Сакавіцкія каты”, “Агні вялікага горада” і іншыя. Былі выказаны словы ўдзячнасці усім, хто меў дачыненне да творчых здабыткаў узорнай студыі, якая калісьці пачынала сваю дзейнасць як гурток. Самі ж рабяты і іх педагогі былі ўзнагароджаны заслужанымі шчырымі апладысментамі гледачоў за сапраўды вялікую сумесную работу. 

Аляксандр ХАХЛОЎ.

Фота аўтара.

 

 

Добавить комментарий

Ваш адрес email не будет опубликован.