“Дзіцячы сенафэст” паклікаў на “пакос”

Весела, заўзята і запамінальна ў Кіраўску прайшла гульня-квэст “Дзіцячы сенафэст-2019”. Сёлета да цікавых і непаўторных народных традыцый, звязаных з часам касавіцы, было вырашана далучыць дзяцей і падлеткаў — пакуль што ў гульнявой форме.

Падзеі вечара адбываліся на імправізаванай пляцоўцы каля раённага Цэнтра культуры і вольнага часу, якая была аформлена ў народным стылі, і дзе ўдзельнікаў і гледачоў сустракала выстава фігур з сена і прыроднага матэрыялу, што дадавала святу асаблівы каларыт.
Мерапрыемства пачалося з агульнага пастраення каманд, пры­ехаўшых з розных куткоў Кіраўшчыны, знаёмства іх з журы, у якое ўвайшлі культработнікі раёна. У спаборніцтвах прынялі ўдзел 8 каманд школьнікаў раёна, якія рыхтаваліся пры ўстановах культуры населеных пунктаў: гэта “Алыя ветразі” Баравіцкага СДК, “Аптымісты” Дабаснянскага СДК, “Незабудкі” Мышкавіцкага СДК, “Каласкі” Паўлавіцкага СЦК, “Праменьчык” Жыліцкага СДК, “Адчайныя” Скрыпліцкага СДК, “Васількі” Любоніцкага СДК, а таксама “Рамонкі”, якую прадстаўлялі вучні СШ №1 райцэнтра.
Удзельнікаў віталі Фея лугоў і Фея кветак, якія пазнаёмілі рабят з даўнім абрадам “травяны пояс”. Ён праходзіў раней у першы дзень выхаду жыхароў вёскі на кашэнне траў. Жанчыны разам звычайна збіралі свежаскошаную траву, звівалі яе і скручвалі ў доўгія жгуты, плялі травяныя паясы, уплятаючы ў іх палявая кветкі. Адзін такі пояс быў прадэманстраваны рабятам.
Затым пасля жараб’ёўкі з удзелам капітанаў каманд пачаліся непасрэдна конкурсы — цікавыя і захапляльныя. Першы з іх меў назву “Вясёлы пакос”. Рабяты разам з Феямі лугоў і кветак, якія былі і вядучымі праграмы гульні-квэста, адправіліся на імправізаваны сенакос. Касіць па-сапраўднаму ім, праўда, не давялося, бо гэта патрабуе спецыяльнай падрыхтоўкі і трэніроўкі, а вось прыстасаваннямі ў форме касы ім патрэбна было па чарзе “скасіць” участак — перамя­шчаць у пэўным парадку скатаныя з сена шарыкі, прадэманстраваўшы пры гэтым немалы спрыт. У адным этапе ўдзельнічалі па 2 каманды. Пераможцы прахо­дзілі ў паўфіналы і фінал. Самымі спрытнымі і дружнымі аказаліся члены каманды “Адчайныя” са Скрыпліцы, другое і трэцяе месцы адпаведна занялі “Незабудкі” з Мышкавіч і “Каласкі” з Паўлавіч.
Скошанае і высушанае сена, як вядома, трэба скласці ў стог. У наступным конкурсе “Стагаванне” ўдзельнікам па той жа схеме — на хуткасць і якасць — неабходна было па чарзе даставіць на пэўнае месца сянныя шарыкі і скласці з іх піраміду, сімвалізуючую стог. Лепш за ўсіх з заданнем удалося справіцца камандзе “Алыя ветразі” з Баравіцы, на другім і трэім месцах адпаведна “Каласкі” з Паўлавіч і “Васількі” з Любоніч.
Для ўдзелу ў наступных конкурсах камандам былі загадзя дадзены дамашнія заданні, таму прыехалі яны не з пустымі рукамі, а з пэўнымі загатоўкамі. Для конкурсу пляцення вянкоў “Палявы цуд” былі прывезены разнастайныя кветкі, а вось вянок трэба было сплесці непасрэдна на свяце. Усе рабяты вельмі пастараліся, праявілі фантазію. А самым арыгінальным вянком, які, да таго ж, быў сплецены хутчэй за ўсіх, быў прызнаны вянок каманды “Алыя ветразі”, другое і трэцяе месцы адпаведна — у ”Праменьчыка” з Жыліч і “Рамонка” з СШ№1.
Яшчэ большую фантазію прадэманстравалі прадстаўнікі каманд у конкурсе касцюмаў з прыроднага матэрыялу “Карнавал лясных фей”. Здзіўленаму журы было даволі няпроста вызначыць лепшую работу. І, тым не менш, перамогу святкавала каманда “Каласкі”. У прызавую тройку ўвайшлі таксама касцюмы каманд “Васількі” і “Аптымісты”.
Цікавымі і арыгінальнымі аказаліся букеты, якія былі прадстаўлены ўдзельнікамі ў адпаведным конкурсе. Тут таксама перамаглі “Каласкі”, другое і трэцяе месцы былі прысуджаны камандам “Праменьчык” і “Васількі”.
Па ходу правядзення конкурснай праграмы рабяты з задавальненнем адказвалі на цікавыя пытанні вясёлай віктарыны, танцавалі. А потым сталі гледачамі і ўдзельнікамі канцэртнай праграмы, музычныя нумары да якой прадаставіла кожная каманда.
Пераможцы і прызёры конкурсаў былі ўзнагароджаны дыпломамі адпаведных ступеней, а ўсім удзельнікам уручаны памятныя сувеніры, якія будуць нагадваць рабятам пра незабыўнае свята. Завяршылася яно, дарэчы, агульнай дыскатэкай, і кожны адправіўся дадому толькі з самымі станоўчымі эмоцыямі і вялікай порцыяй пазітыву.
Аляксандр ХАХЛОЎ.
Фота аўтара.

Добавить комментарий

Ваш адрес email не будет опубликован.