55-гадовы юбілей святкаваў перадавы механізатар ААТ “Рассвет імя К.П.Арлоўскага” Мікалай Белакурскі

У мінулую нядзелю святкаваў свой 55-гадовы юбілей перадавы механізатар ААТ “Рассвет імя К.П.Арлоўскага” Мікалай Белакурскі, удастоены ордэна Пашаны, медаля “За працоўныя заслугі”.

З раніцы Мікалай Іванавіч быў на сваім рабочым месцы — за рулём трактара на полі, дзе праводзіў узворванне глебы: восеньскія работы працягваюцца, і адпачываць пакуль рана…

Прама сюды, каб павіншаваць механізатара са знамянальнай датай у яго жыцці, завіталі старшыня райкама прафсаюза работнікаў АПК Віктар Ставер, кіраўніцтва “Рассвета”: дырэктар Аляксандр Багель, яго першы намеснік Аляксандр Жылінскі, намеснік па ідэалагічнай рабоце Наталля Шапавалава.

 Мікалай Іванавіч прыпыніў трактар і рушыў да гасцей, шчыра ўсміхаючыся ім. У яго адрас прагучалі словы ўдзячнасці за руплівую, выніковую працу,    найлепшыя пажаданні здароўя, дабрабыту, новых працоўных перамог, былі ўручаны падарункі і кветкі.

Практычна няма такой работы, якую б ні выконваў Мікалай Белакурскі на палях. Ворыва і падрыхтоўка глебы, унясенне ўгнаенняў, апрацоўка ўчасткаў, сяўба і догляд за пасевамі. І, безумоўна, вянец працы многіх  людзей — уборка збажыны. Хто-хто, а сапраўдную цану хлебу ведае менавіта той, хто яго не аднойчы вырошчваў, зберагаў кожны каласок, а потым убіраў.

Усю сваю прафесійную дзейнасць ды нават і ўсё жыццё Мікалай Белакурскі звязаў з працай на зямлі-карміцельцы. І ўсе 35 год стажу ён прысвяціў роднай гаспадарцы. Любоў і павагу да сялянскай працы прывіў яму бацька Іван Ануфрыевіч, які не адзін дзясятак год адпрацаваў у “Рассвеце”. Ад яго Мікалай засвоіў важнасць земляробскай справы. А потым гэтыя якасці прывіў і свайму сыну Сяргею, які не адзін сезон дапамагаў бацьку ўбіраць хлеб на камбайне. Такая вось сямейная дынастыя Белакурскіх — не не паказ, а шчыра, ад душы…

У скарбонцы дасягненняў земляроба — узнагароды за выдатную працу на разнастайных відах работ. У 2006 годзе Мікалай Іванавіч стаў пераможцам сярод камбайнераў краіны і на рэспубліканскім фестывалі-кірмашы працаўнікоў вёскі “Дажынкі” атрымаў ключы ад аўтамабіля з рук Кіраўніка дзяржавы Аляксандра Лукашэнкі. У гэтым жа годзе за добрасумленную працу рассветавец быў удастоены медаля “За працоўныя заслугі”. А праз дзясятак год парадны пінжак Мікалая Іванавіча ўпрыгожыў ордэн Пашаны. І гэта сапраўды аб’ектыўная ацэнка яго выніковай працы.

Добавить комментарий

Ваш адрес email не будет опубликован.