Акцыя “У славу агульнай Перамогі!” працягваецца на Кіраўшчыне
На Кіраўшчыне працягваецца першы этап рэспубліканскай акцыі “У славу агульнай Перамогі!”, у межах якой з месцаў усіх воінскіх пахаванняў будуць узяты жмені зямлі, якая разам з зямлёй такіх жа памятных месцаў рэгіёнаў нашай краіны будуць сабраны ў спецыяльныя капсулы са спісамі з імёнамі загінуўшых падчас Вялікай Айчыннай вайны воінаў для закладкі ў Храм-помнік у гонар Усіх Святых у Мінску.
З гэтай нагоды ў Кіраўску прайшлі мітынгі на месцах пахавання вайскоўцаў і мірных жыхароў. Удзел у іх прынялі прадстаўнікі аддзела па ідэалагічнай рабоце, культуры і справах моладзі райвыканкама, грамадскіх арганізацый і аб’яднанняў, грамадскасці, моладзь, школьнікі.
Каля брацкай магілы па вул.Арлоўскага ў раёне цэнтральнай райбальніцы прысутнічалі таксама супрацоўнікі ЦРБ на чале з намеснікам галоўнага ўрача Таццянай Комар-Маскалёвай.
Ганаровую вахту каля пахаванняў падчас мітынгаў неслі школьнікі: каля магілы невядомага лётчыка, пахаванага на могілках па вул.Валадарскага — вучні СШ №1, каля брацкай магілы воінаў і партызан, загінуўшых у гады Вялікай Айчыннай вайны, размешчанай па вул.Гагарына — вучні СШ №2 імя К.П.Арлоўскага.
Да прысутных на мітынгах звярнуліся намеснік галоўнага ўрача ЦРБ Таццяна Комар-Маскалёва, старшыня раённай арганізацыі РГА “Белая Русь” Васіль Маркевіч, настаўнік гісторыі СШ №2 імя К.П.Арлоўскага Валянціна Яскевіч, якія падкрэслілі важнасць акцыі, прысвечанай 75-годдзю Вялікай Перамогі, у справе патрыятычнага выхавання грамадзян нашай краіны, у асаблівасці школьнікаў, моладзі. Неабходна шанаваць памяць аб тых, хто змагаўся з ворагам у імя міру на зямлі.
Мінутай маўчання ўдзельнікі мітынгу ўшанавалі памяць загінуўшых у гады Вялікай Айчыннай вайны. Затым з іх магіл былі ўзяты жмені зямлі і змешчаны ў спецыяльныя ёмістасці. Гэтае права было прадастаўлена в.а.начальніка аддзела па ідэалагічнай рабоце, культуры і па справах моладзі Вікторыі Бяляўскай, прадстаўніку БРСМ Надзеі Карпавай, а таксама на брацкай магіле па вул. Гагарына разам з імі — начальніку адасобленай групы (па Кіраўскім раёне) ваеннага камісарыята г.Бабруйска, Бабруйскага, Глускага і Кіраўскага раёнаў Андрэю Гайдукевічу.