У межах рэспубліканскай акцыі “Нашы дзеці” у Цэнтры культуры і вольнага часу прайшло традыцыйнае раённае дабрачыннае свята, у якім прынялі ўдзел пераможцы раённых, абласных алімпіяд, творчых конкурсаў, турніраў, спаборніцтваў, а таксама дзеці-інваліды, дзеці-сіроты, дзеці, застаўшыеся без бацькоўскай апекі.

На свята завіталі ганаровыя госці – старшыня райвыканкама Міхаіл Гулы, першы намеснік старшыні райвыканкама – начальнік упраўлення па сельскай гаспадарцы і харчаванні Аляксандр Сухадольскі, старшыня раённага Савета дэпутатаў Галіна Слабоднікава, намеснікі старшыні райвыканкама, члены раённага выканаўчага камітэта, кіраўнікі раённых структур грамадскіх аб’яднанняў.

Шчырыя віншаванні адрасаваў прысутным у зале старшыня райвыканкама Міхаіл Гулы. У сваім выступленні ён спыніўся на адметных поспехах вучняў устаноў адукацыі раёна. Толькі за мінулы год па выніках адукацыйных, творчых, спартыўных конкурсаў, спаборніцтваў імі заваявана больш за 300 дыпломаў абласнога, рэспубліканскага і міжнароднага ўзроўняў. Так, высокіх дасягненняў дабіліся Анастасія Бялянава з СШ №1, якая на заключным этапе рэспубліканскай алімпіяды атрымала дыплом ІІ ступені па вучэбным прадмеце “Працоўнае навучанне”, дзяўчына была ўзнагароджана прэміяй спецыяльнага фонду Прэзідэнта Рэспублікі Беларусь і ўнесена ў банк дадзеных адоранай моладзі Рэспублікі Беларусь, Віктар Будніцкі з СШ №1, які ў заключным этапе рэспубліканскай алімпіяды па гісторыі ўзнагароджаны заахвочвальным прызам. У Год малой радзімы значныя поспехі былі ў Вольгі Прыгажаевай з Барчыцкага НПК ДС-СШ, стаўшай прызёрам навукова-практычнай канферэнцыі “Першыя крокі ў навуку”, Лізаветы Пялавай з СШ №2 імя К.П.Арлоўскага, атрымаўшай дыплом ІІ ступені на рэспубліканскай навукова-практычнай канферэнцыі “Краязнаўчыя даследаванні як сродак прыцягнення вучняў да пошукава-даследчай дзейнасці”, Дар’і Ананіч з ЦДАДіМ, якая стала пераможцам рэспубліканскага конкурсу юных чытачоў “Жывая класіка”. Выхаванцамі клуба інтэлектуальных гульняў “Эрудыт” заваёвана больш за 40 дыпломаў у інтэлектуальных турнірах і чэмпіянатах рэспубліканскага і абласнога ўзроўняў.
Вучні Паўлавіцкай СШ імя Р.А.Худалеева ў саставе зборнай каманды вобласці сталі пераможцамі рэспубліканскіх спаборніцтваў па зімовым мнагабор’і “Здароўе” дзяржаўнага фізкультурна-аздараўленчага комплексу Рэспублікі Беларусь.

Спартсмены СДЮШАР сталі ўладальнікамі 4 першых камандных месцаў, 10 другіх, 7 трэціх месцаў па валейболе, футболе, веласпорце, цяжкай атлетыцы. Дастойныя рэзультаты паказалі кіраўчане на Спартакіядзе школьнікаў, Спартакіядзе дзіцяча-юнацкіх спартыўных школ Магілёўскай вобласці, першынстве вобласці па розных відах спорту. Міхаіл Гулы адзначыў, што ўсе гэтыя перамогі – яркі прыклад таго, што дзякуючы таленту, працавітасці і ўпартасці можна скарыць любыя вяршыні, увасобіць у жыццё самыя смелыя мары.

Старшыня райвыканкама пажадаў рабятам новых перамог і дасягненняў у надыходзячым годзе не толькі ў вучобе, але і ва ўсіх добрых пачынаннях.

Асаблівыя словы ўдзячнасці за выхаванне і клопат аб дзецях прагучалі ў адрас настаўнікаў, якія сваім уласным прыкладам вучаць маладое пакаленне кіраўчан любіць сваю малую радзіму, свята шанаваць гістарычнае мінулае краіны.

Міхаіл Гулы павіншаваў усіх з надыходзячымі навагоднімі і каляднымі святамі. Рабяты выказалі кіраўніку раёна словы падзякі за падтрымку і разуменне, за магчымасць займацца любімымі справамі ў розных гуртках па інтарэсах і спартыўных секцыях. У падарунак ад імя ўсіх вучняў устаноў адукацыі яны паднеслі карціну, на якой была выява аднаго з казачных і прыгожых вугалкоў Кіраўшчыны.

А потым на сцэне разгарнулася навагодняе прадстаўленне “Шчаўкунчык” на сучасны лад з Дзедам Марозам і Снягуркай, добрымі і злымі персанажамі, апошнія, як заўжды, імкнуліся сапсаваць надыходзячае чароўнае свята. Рабяты шчыра хваляваліся за лёс прынца Шчаўкунчыка, зачараванага злой каралевай Мышыльдай, за добрую Мары, якая здолела знайсці арэх Кракатук і вызваліла прынца ад злых чараў. Нягледзячы на ўсе казачныя перыпетыі, дабро перамагло, і Новы год прыйшоў да рабят і дарослых. Усе дружна паклікалі Дзеда Мароза і Снягурку і запалілі агеньчыкі на навагодняй ёлцы. Яшчэ адным яркім і радасным момантам свята сталі салодкія падарункі, якія атрымалі ўсе прысутныя ў зале хлопчыкі і дзяўчынкі.
Людміла СЯМЁНАВА.

Фота Максіма МІКЕШЫНА.