Бліц-апытанне з нагоды юбілею Кіраўшчыны
Аляксандр СЕРАКОЎ, выконваючы дырэктар Магілёўскага абласнога аграпрамысловага саюза, ветэран працы, узнагароджаны ордэнам Пашаны, медалём «За працоўныя заслугі», ганаровы гра мадзянін раёна:
– Так сталася, што Кіраўскі раён, адкуль родам мая жонка, назаўсёды стаў для мяне другой радзімай. Сам я з Мсціслаўшчыны. У 1979 годзе мы пераехалі на Кіраўшчыну, дзе месцам маёй работы стала пасада эканаміста ў калгасе “Чырвоны баец”. Час праляцеў незаўважна, за які, між тым, аддаў працы ў гэтай гаспадарцы і аграрным сектары 35 год, 16 з якіх – на пасадзе кіраўніка.
За значны перыяд жыцця пасапраўднаму зросся з Кіраўскай зямлёй, прычым у шырокім сэнсе гэтага слова, паколькі і працаваў на ёй, імкнуўся аддаць свае веды, уменні і навыкі, а пасля і вопыт. Тут выраслі і выхаваліся дзеці, якія яшчэ больш умацавалі нашы карані. Думаю, не памылюся і выкажу думку многіх, што ў Кіраўскім раёне заўсёды панавала і пануе нейкая асаблівая атмасфера, якая садзейнічае плённай стваральнай працы. А, галоўнае, тут добрыя, шчырыя і адкрытыя людзі, з якімі прыемна побач жыць і працаваць, адчуваць, што ты ім патрэбен. І гэта, безумоўна, надае і фізічных, і маральных сіл.
Добрыя словы хачу адрасаваць кіраўнікам сельгасарганізацый, спецыялістам раёна. Ведаю, што многія мае калегі па аграрным сектары краіны, хто хоць раз пабываў на Кіраўшчыне, падобраму зайздросцяць мясцовай падборцы кадраў, іх граматнасці, кампетэнтнасці, а, галоўнае, адданасці сваёй справе. Тут заўсёды адчуваюцца ўзаемавыручка, дапамога, павага і выдатныя чалавечыя зносіны. Усё гэта ў большасці, думаю, з’яўляецца вырашальным фактарам у тым, што Кіраўскі раён з’яўляецца адным з флагманаў у сельскай гаспадарцы Магілёўшчыны.
Вельмі ганаруся ацэнкай у раёне сваёй працоўнай дзейнасці. Перад аграрыямі стаіць няпростая задача: забяспячэнне дабрабыту нашага народа. Па меры магчымасцей буду імкнуцца і далей быць карысным людзям у гэтым накірунку – дапамагаць маладзейшым калегам словам і справай. Рады, што мне давяраюць і зараз, калі знаходжуся на заслужаным адпачынку. Будзем і надалей накіроўваць работу абласнога аграпрамысловага саюза на паляпшэнне ўзроўню жыцця людзей сяла.
Напярэдадні юбілею раёна хачу пажадаць усім жыхарам Кіраўшчыны моцнага здароўя, поспехаў, дабрабыту і працвітання!