Прафілактыка мае важнае значэнне пры любым захворванні, асабліва інфекцыйным. У барацьбе з каранавірусам сярод асноўных мер – выкананне і захаванне элементарных правілаў гігіены, захаванне сацыяльнага дыстанцыравання, выкарыстанне медыцынскіх масак.

Шэраг прафілактычных мерапрыемстваў прадпрымаюць арганізацыі і прадпрыемствы, якія працуюць з вялікай колькасцю людзей: магазіны і аб’екты грамхарчу райспажыўтаварыства, філіял “Аўтапарк №14” і інш.
Належную ўвагу надаюць рабоце па прафілактыцы распаўсюджвання COVID-19 у філіяле “Аўтапарк №14”. На пастаяннай аснове праводзіцца поўная апрацоўка дэзынфіцыруючымі сродкамі салонаў аўтобусаў. На ўваходзе ў транспартных сродках маюцца дазатары з антысептыкамі для апрацоўкі рук пасажыраў. У вадзіцеляў ёсць антыбактэ­рыяльныя сурвэткі, а таксама вадкія спецпрэпараты для апрацоўкі салона аўтобуса, у выпадку вострай неабходнасці, і рук.
Інфармацыйны стэнд аб мерах прафілактыкі каранавірусу размешчаны пры ўваходзе ў аўтастанцыю, побач – навясны дазатар з антысептыкам.
У мэтах прафілактыкі, недапушчэння распаўсюджвання каранавіруснай інфекцыі УКП “Жылкамгас” працягвае правядзенне работ па дэзінфекцыі месцаў агульнага карыстання, дзіцячых пляцовак, аўтобусных прыпынкаў, вуліц і іншых.
У 6 інтэрнатах, якія знаходзяцца на балансе камунальнікаў, ажыццяўляецца апрацоўка спецпрэпаратамі лесвічных пралётаў, сцен, падлогі, поручняў. Такія ж мерапрыемствы праводзяцца ў пад’ездах шматпавярховых дамоў, якіх на абслугоўванні УКП “Жылкамгас” 221. Прыбіральшчыцы дадаткова мыюць з дэзсродкамі дзверы і дзвярныя ручкі, вокны і падаконнікі, паштовыя скрыні.
У адпаведнасці з санітарнымі правіламі з дапамогай палівамыйнай машыны са спецсродкамі праводзіцца апрацоўка асфальтабетоннага пакрыцця вуліц горада і дваравых тэрыторый шматпавярховых дамоў, прыпынкаў грамадскага транспарту, якія належаць камунальнікам.
Работнікі райЦГЭ право­дзяць маніторынгі па арганізацыях і ўстановах раёна, падчас якіх правяраюць наяўнасць дазатараў з антысептыкамі для апрацоўкі рук, як для працуючых, так і наведвальнікаў. На кантролі – правядзенне вільготных санітарных апрацовак памяшканняў дэзсродкамі.
Строга прытрымліваюцца ў перыяд небяспечнай эпідэміялагічнай сітуацыі правілаў абслугоўвання пакупнікоў магазіны і аб’екты грамхарчу райспажыўтаварыства. Паўсюль – інфармацыя аб спосабах абароны ад каранавірусу, рэкамендацыі аб захаванні паміж пакупнікамі сацыяльнага дыстанцыравання на адлегласці не менш 1,5-2 метраў. У кожным гандлёвым аб’екце маюцца дазатары з антысептыкамі. Тэхперсанал апрацоўвае дэзынфіцыруючымі сродкамі дзвярныя ручкі, падаконнікі, іншыя паверхні, часцей мые падлогу. Сярод прадаўцоў уведзены масачны рэжым, таксама яны выкарыстоўваюць пры абслугоўванні пакупнікоў пальчаткі.
Фота Максіма МІКЕШЫНА.