“Летнія” клопаты рассветаўскіх цяплічнікаў у лютаўскі холад

За вокнамі – мінусавая тэмпература, зямлю ўсцілае белае покрыва, а  калі пераступіць парог цяплічнай гаспадаркі ААТ “Рассвет імя К.П.Арлоўскага”, то, нібыта ў казцы, трапляеш у лета, дзе пануе цёплае вільготнае паветра, шмат святла і зялёных раслін…

 

Плодаагароднінавод Ганна Новікава працуе ў цяплічным камбінаце 10 год

Рассветаўскія цяплічнікі ўпэўнена ўвайшлі ў новы працоўны сезон. Летась дзякуючы іх намаганням быў атрыманы багаты ўраджай таматаў і агуркоў. Як нам паведаміла галоўны тэхнолаг камбіната Марыя Бяляўская, сабралі больш за 4,6 тыс.т усіх пладоў – на 4 т перавышаны збор папярэдняга года. З іх – больш за 3,5 тыс.т таматаў і больш за 1,1 тыс.т – агуркоў.

Зараз у памяшканнях цяпліц поўным ходам кіпіць работа. Падмурак пад будучы сёлетні ўраджай мясцовыя працаўнікі пачалі закладваць яшчэ напрыканцы мінулага года.

– Своечасова пасяўныя плошчы былі вызвалены ад рэшткаў старых раслін, матэрыялаў нерасліннага паходжання, патрыхтавана ўсё неабходнае для сяўбы новага насення, – расказала Марыя Мікалаеўна. – 17 снежня ў расадным аддзяленні былі пасеяны таматы, а 30 снежня – агуркі. У якасці гатункаў зноў было вырашана выкарыстаць тыя, што даўно сябе зарэкамендавалі ў нашых “шыротах” – буйнапладовыя гібрыды таматаў “альтадэна” і “тарэра”, а таксама сярэднепладовыя агуркі “яні”. З моманту сяўбы расліны набылі неабходную форму, і іх высадзілі з матачніка на пастаяннае месца далейшага росту. На новай цяпліцы на 3 га высаджаны таматы, на старой яны занялі 5 га, і яшчэ на 2 га высаджаны агуркі.

Уважліва даглядаюць расліны Ала Масюковіч і Святлана Бяляўская

Зараз плодаагароднінаводы актыўна завіхаюцца каля раслін, якія з кожным днём набіраюць моц. Догляд уключае ў сябе некалькі пунктаў: зразанне лішніх пабегаў, пасынкаванне, падкручванне, фарміраванне куста. Кожная расліна не абдзелена клопатам і ўвагай. І агуркі, і таматы – культуры патрабавальныя: рабочым трэба захоўваць усе неабходныя кліматычныя і тэхналагічныя ўмовы, уважліва сачыць за ўзроўнем вільготнасці і пладавітасці глебы, не забывацца пра барацьбу са шкоднікамі.

Дарэчы, як падкрэсліла Марыя Бяляўская, у цяплічным камбінаце працуе калектыў сапраўдных аднадумцаў – даволі вялікі, але вельмі зладжаны і дружны. Жанчын тут большасць – 105 прадстаўніц цудоўнай паловы чалавецтва. У асноўным гэта плодаагароднінаводы. Па выніках леташняга сезону найбольшы ўраджай таматаў атрымала Ірына Косарава – 65,7 т пры сярэдняй ўраджайнасці – па 52,4 кг з м2. У ліку лепшых “таматніц” таксама былі Караліна Бед, Кацярына Сакабіцкая. Сярод тых, хто працаваў на вырошчванні агуркоў, – Наталля Андрэева, якая атрымала 47 т пладоў пры ўраджайнасці па 55,5 кг з м2. Добрых слоў заслугоўвае работа іншых плодаагароднінаводаў.

Аграномы Алена Бяляўская і Таццяна Стэльмах аналізуюць захаванасць развіцця раслін

Мужчынская каманда камбіната налічвае 40 абслугоўваючых работнікаў, без якіх агульны працэс вырошчвання агародніны ў закрытым грунце быў бы  немагчымым. Гэта хімікі, грузчыкі, электраманцёры, аператары, вадзіцелі, шкляры. Без рамонтнікаў, бывае, таксама не абысціся. Гады пакрысе пакідаюць свой адбітак: старой цяпліцы пайшоў ужо 37-ы год, новай – 15-ты…

Зусім хутка, заверыла галоўны тэхнолаг, расліны павінны зацвісці. А, значыць, пачнецца ў рабочым працэсе новы этап. І на ім да мясцовых работнікаў падключацца маленькія крылатыя памочнікі – чмялі, ад руплівасці якіх залежыць таксама многае: апыленне раслін – жыццёва важны  момант для іх пладавітасці.

Аляксандр ХАХЛОЎ.

Фота Максіма МІКЕШЫНА.

 

Подписывайтесь на нас в социальных сетях: «Одноклассники» и «Одноклассники» (группа), «ВКонтакте», «Фейсбук», «Instagram», «Telegram», «Яндекс Дзен».

 

Добавить комментарий

Ваш адрес email не будет опубликован.