Дораць радасць сельскія артысты са Скрыпліцы
Сярод устаноў культуры на лепшую пастаноўку работы по развіцці культуры пераможцам раённага спаборніцтва прызнаны калектыў Скрыпліцкага сельскага Дома культуры.
З вялікім задавальненнем жыхары Скрыпліцы наведваюць мясцовы СДК. Святочныя канцэрты, забаўляльныя праграмы, пазнавальныя мерапрыемствы тут праводзяцца даволі часта. Значная заслуга ў тым, што ў ачагу культуры аграгарадка па-сапраўднаму бруіць жыццё, – мясцовага дырэктара, сапраўднага энтузіяста сваёй справы Галіны Пімошынай.
Педагог па адукацыі, Галіна Міхайлаўна доўгі час працавала ў Скрыпліцкай СШ на розных пасадах, у тым ліку намеснікам дырэктара па выхаваўчай рабоце. Яшчэ некалькі год працавала загадчыкам у Скрыпліцкім яслях-садку. Таму нядзіўна, што ў арганізацыі разнастайных мерапрыемстваў ведае толк і ўсе аспекты. А таму, узначаліўшы ў 2019 годзе СДК, з радасцю і ахвотай узялася за гэты ўчастак работы. І па сутнасці надала ёй новы імпульс.
Тут здольны зацікавіць дзяцей у гуртках па інтарэсах: рабяты не аднойчы прымалі ўдзел у раённых конкурсах і займалі ў іх прызавыя месцы. Наладжаны творчы працэс у арганізацыі вольнага часу і адпачынку жыхароў аграгарадка.
Візітнай карткай Дома культуры стаў творчы калектыў “Скрыплічаначка”. Галіна Пімошына сабрала такіх жа апантаных творчасцю аматараў народнай песні. Сярод іх – загадчык бібліятэкі Галіна Няфёдава, культарганізатар СДК Ларыса Гушчына, пенсіянеркі Фаіна Носава, Еўдакія Сухарава. А віртуозна акампануе жанчынам муж апошняй з названых – вядомы ў раёне гарманіст Васіль Сухараў, якога яшчэ ведаюць і як цудоўнага майстра-каваля. Ансамбль актыўна выступае не толькі перад землякамі з аграгарадка, а і на многіх канцэртных пляцоўках раёна і нават вобласці. Летась, да прыкладу “Скрыплічаначка” прыняла ўдзел у абласным конкурсе “Падняпроўскі гармонік”, адкуль удзельнікі прывезлі адразу некалькі дыпломаў, у тым ліку і І ступені ў намінацыі “Народная прыпеўка”. Але, як самі лічаць самадзейныя артысты, самыя лепшыя ўзнагароды за іх творчасць – гэта цудоўны настрой іх слухачоў і гледачоў. Калі такое адчуваецца, то і хочацца дарыць людзям радасць!
Аляксандр ХАХЛОЎ.