Кіраўскі раённы Цэнтр сацыяльнага абслугоўвання насельніцтва: “Мы – адзіная згуртаваная каманда!”
Па выніках работы за 2020 год калектыў раённага цэнтра сацыяльнага абслугоўвання насельніцтва заняў трэцяе месца ў рэспубліканскім конкурсе на званне “Лепшы тэрытарыяльны цэнтр сацыяльнага абслугоўвання насельніцтва”. Адпаведны Дыплом Рэспубліканскага камітэта Беларускага прафсаюза работнікаў дзяржаўных і іншых устаноў намеснік дырэктара ўстановы Таццяна Дашкевіч атрымала падчас выніковага пасяджэння калегіі Міністэрства працы і сацыяльнай абароны. Таксама калектыў удастоены Падзякі міністра працы і сацыяльнай абароны Ірыны Касцевіч.
Супрацоўнікі Цэнтра сацабслугоўвання насельніцтва – згуртаваная каманда аднадумцаў, якая добрасумленна выконвае сваю работу, ставіцца да яе з душой, вынікам чаго з’яўляецца той факт, што на працягу апошніх 8 год установа ўваходзіць у тройку лідараў па выніках абласнога агляду якасці і культуры сацыяльнага абслугоўвання насельніцтва.
Спецыялісты РЦСАН вядуць работу з шырокім колам насельніцтва. За час дзейнасці цэнтра яго структура развівалася ў залежнасці ад запатрабаванняў грамадзян і зараз уключае ў сябе
5 аддзяленняў: пярвічнага прыёму, аналізу, інфармавання і прагназавання; сацыяльнай дапамогі на даму; сацыяльнай адаптацыі і рэабілітацыі і суправаджаемага пражывання; дзённага знаходжання для інвалідаў і грамадзян пажылога ўзросту; кругласутачнага знаходжання для грамадзян пажылога ўзросту і інвалідаў.
На здымку: загадчыкі аддзяленняў РЦСАН – Вольга Дзятлава (першая злева), Маргарыта Гіраеўская, Наталля Фіневіч, Алла Печань, у цэнтры – намеснік дырэктара Таццяна Дашкевіч.