Ва ўрачыстай цырымоніі ўручэння дзяржаўных узнагарод і генеральскіх пагонаў, якая адбылася ўчора ў Мінску, прыняла ўдзел прадстаўніца Кіраўшчыны Валянціна Клімовіч, аператар машыннага даення ААТ “Рассвет імя К.П.Арлоўскага”. Напярэдадні загадам Кіраўніка дзяржавы ёй у ліку іншых было прысвоена ганаровае званне заслужанага работніка сельскай гаспадаркі. Прэзідэнт Рэспублікі Беларусь Аляксандр Лукашэнка ўручыў ёй адпаведны нагрудны знак. 

Валянціна Клімовіч раней была ўдастоена высокіх дзяржаўных узнагарод – ордэна Пашаны, медаля “За працоўныя заслугі”, яна з’яўляецца Ганаровым грамадзянінам Кіраўскага раёна.

Па прыездзе дадому мы папрасілі Валян­ціну Леанідаўну падзяліцца ўражаннямі:
– Безумоўна, хвалявалася, хаця ў падобным мерапрыемстве прымала ўдзел ужо ў трэці раз. Прэзідэнт у свой час уручаў мне медаль “За працоўныя заслугі” і ордэн Пашаны. Гэта вельмі ганарова, але і адказна. Я вельмі ўдзячная кіраўніцтву нашай дзяржавы за тое, што высока ацэньвае нашу руплівую працу ў сельскай гаспадарцы.
2 красавіка споўніцца 40 год, як я працую ў жывёлагадоўлі ў знакамітай гаспадарцы, якая зараз мае назву ААТ “Рассвет імя К.П.Арлоўскага”. І хачу адзначыць, што поспехі, дасягненні кожнага – заслуга ўсяго калектыву, кіраўніцтва. Для нас ствараюцца найлепшыя ўмовы працы, укараняюцца сучасныя тэхналогіі – толькі шчыруй на карысць роднай Беларусі!
Прэзідэнт Аляксандр Рыгоравіч Лукашэнка на цырымоніі адзначыў, што яна мае асаблівы сэнс у Год народнага адзінства. Зрабіць нашу краіну больш моцнай і квітнеючай мы можам толькі калі будзем згуртаванымі і адзінымі ў сваіх памкненнях і справах.
Карыстаючыся выпадкам, Валянціна Клімовіч выказала жанчынам Кіраўшчыны віншаванні з надыходзячым святам 8 Сакавіка, пажадала моц­нага здароўя, поспехаў у працы, хатняй утульнасці і дабрабыту, мірнага неба над галавой.
Фота БелТА.

Подписывайтесь на нас в социальных сетях: «Одноклассники» и «Одноклассники» (группа), «ВКонтакте», «Фейсбук», «Instagram», «Telegram», «Яндекс Дзен».