Сярод работнікаў вядучых прафесій арганізацый раёна званне “Лепшы па прафесіі” ў намінацыі “Лепшы работнік заатэхнічнай службы” прысвоена заатэхніку СГФ “Чыгірынка” РУП “Беларуснафта-Магілёўаблнафтапрадукт” Ганне Каліноўскай.
Свой прафесійны шлях у сельгасфіліяле яна пачала з 2014 года, калі прыехала ў Чыгірынку на пастаяннае месца жыхарства з украінскай Горлаўкі. Маладая жанчына – дагэтуль гарадская жыхарка з адукацыяй хіміка-тэхнолага – пачала асвойваць працу ў сельскагаспадарчай галіне, як гаворыцца, “з нуля”. Спачатку ўладкавалася ў паляводчую брыгаду. Затым пэўны час была аператарам ПЭВМ у адміністрацыйным будынку прадпрыемства. Аднак, як прызналася Ганна Вадзімаўна, ёй не хацелася сядзець на адным месцы, у кабінеце, працуючы з паперамі. Было моцнае жаданне асвойваць галіну жывёлагадоўлі, якая з’яўляецца прыярытэтнай у сельгасфіліяле. З гэтай мэтай, заручыўшыся падтрымкай кіраўніцтва, пачала працаваць брыгадзірам на МТФ “Колбава”. У 2019 годзе стала студэнткай факультэта біятэхналогіі і аквакультуры БСГА, дзе вучыцца па спецыяльнасці “заатэхнія”, і адначасова была назначана на пасаду заатэхніка СГФ “Чыгірынка”.
Зараз выкананне яе працоўных абавязкаў грунтуецца на чатырох асноўных накірунках узаемадзеяння з жывёлай: селекцыйная работа, кармленне – забеспячэнне паўнавартаснага рацыёну з утрыманнем неабходных мікраэлементаў і вітамінаў, утрыманне, эксплуатацыя – правільнае выкарыстанне наяўнага пагалоўя для атрымання ад яго максімальнай карысці.

Ганна Каліноўская расказала: “Заатэхнік заўсёды працуе ў камандзе. У ходзе сваёй дзейнасці я пастаянна ўзаемадзейнічаю з загадчыкамі ферм, ветэрынарамі, механізатарамі па кармленні і іншымі спецыялістамі. У нашым сельгасфіліяле згуртаваны калектыў жывёлаводаў, у якім у непрадбачнай сітуацыі кожны можа падставіць плячо. Мне, як пачынаючаму спецыялісту, дапамогу і падтрымку аказвае кіраўніцтва сельгасфіліяла, а таксама раённыя спецыялісты галіны жывёлагадоўлі – намеснік начальніка ўпраўлення па сельскай гаспадарцы і харчаванні І.Л.Грышчанка, начальнік філіяла РУСВП “Магілёўскае дзяржплемпрадпрыемства” Г.Л.Шкрабава, безумоўна, брыга­дзіры, загадчыкі нашых ферм”.
За працоўны дзень заатэхнік Каліноўская паспявае пабываць, прасачыць за вытворчымі працэсамі на кожнай ферме, а іх у сельгасфіліяле пяць. Разважаючы над сваёй прафесіяй, у якой за невялікі тэрмін яна дасягнула значных вынікаў, Ганна Вадзімаўна адзначае, што падыходзіць яна людзям, якія любяць жывёлу і гатовы шмат часу аддаваць рабоце з ёй, а таксама працавітым і ўважлівым, валодаючым аналітычным складам розуму і здольнасцю хутка пераключацца паміж рознымі відамі дзейнасці.
Паміж вытворчымі працэсамі і назапашваннем багажу тэарэтычных і практычных ведаў у галіне жывёлагадоўлі Ганна Каліноўская знаходзіць час і сілы для стварэння гармоніі ў сваёй маладой сям’і: летась яна выйшла замуж за ўраджэнца Хвайніцы Віктара, які таксама заняты ў жывёлагадоўлі – шчыруе на кормараздатчыку на МТФ “Чыгірынка”.
Яўгенія БЯЛЬКО.