Да Дня друку. Бліц-апытанне «Раёнка» ў маім жыцці

Ігар КУЗНЯЦОЎ, дырэктар СГФ “Чыгірынка” РУП “Беларуснафта-Магілёўаблнафтапрадукт”:
– Родам я з Клімавіцкага раёна, працаваць на Кіраўшчыне пачаў у далёкім 1986 годзе, тады ж і пазнаёміўся з “Кіраўцам”. З таго часу і дагэтуль – вось ужо больш за тры дзесяцігоддзі – з’яўляюся пастаянным падпісчыкам газеты.
Наша “раёнка” актыўна інфармуе сваіх чытачоў аб усіх важных і адметных падзеях. За апошнія гады ў газеце адбыліся значныя змены, напрыклад, у дызайне і вёрстцы, аўтарскія матэрыялы суправаджаюцца якаснымі фотаздымкамі, з’явілася інтэрнэт-версія выдання, якую я таксама пастаянна праглядаю, “Кіравец” актывізаваўся і ў сацыяльных сетках.
Асноўнымі героямі публікацый журналістаў “раёнкі” па-ранейшаму з’яўляюцца сельскія працаўнікі. Прыемна, што шмат увагі надаецца вяскоўцам, якія шчыруюць у сельскагаспадарчай галіне, іх заслугам і дасягненням. Так, у нашай гаспадарцы карэспандэнтаў “Кіраўца” заўсёды прымаюць з радасцю, павагай і ўдзячнасцю. Для нашых працаўнікоў трапіць на старонкі “раёнкі” – ганарова, гэтакі своеасаблівы стымул для больш якаснай працы.
Газета “Кіравец” – нібы люстэрка жыцця Кіраўшчыны. Ніякі іншы сродак масавай інфармацыі не адлюструе ў поўнай меры тое, што адбываецца ў раёне, так, як гэта робіць наша перыядычнае выданне.
Напярэдадні прафесійнага свята – Дня друку – ад імя ўсяго калектыву СГФ “Чыгірынка” хочацца падзякаваць супрацоўнікам рэдакцыі раённай газеты за ўвагу да нас і іх плённую працу на інфармацыйнай ніве. Будзем з “Кіраўцам”!

 

Аляксандр ЖУРАЎСКІ, старшы інспектар сектара прапаганды і ўзаемадзеяння з грамадскасцю РАНС:
– З “раёнкай” знаёмы з малых год, калі яшчэ вучыўся ў школе. Бацькі заўсёды выпісвалі “Кіравец” – сярод усіх выданняў ён займаў у нас першае месца. Чыталі, безумоўна, і іншыя газеты і часопісы, але раённай газеце ў сям’і аддавалася асаблівая павага. Для мяне было вельмі цікава знаёміцца з навінамі Кіраўшчыны, даведвацца пра мерапрыемствы, якія праводзіліся ў раёне, чытаць пра людзей, іх лёсы і працоўныя будні. Памятаю, як гэта было ганарова – трапіць на старонкі газеты: калі ўбачыш там сваё прозвішча ці фота, пачуццё – не перадаць словамі… З тых часоў я працягваю бацькоўскую традыцыю – пастаянна выпісваю і чытаю “раёнку”.
РАНС вельмі цесна супрацоўнічае з рэдакцыяй “Кіраўца”. І гэта зразумела: нашы публікацыі ў друку, інфармацыі на сайце выдання прызначаны для ўсіх слаёў насельніцтва – ад дзяцей да грамадзян паважанага ўзросту. СМІ – гэта адзін з асноўных рычагоў уздзеяння на насельніцтва ў плане інфармавання і навучання мерам па бяспецы жыццядзейнасці. Папярэджванне пажараў і гібелі людзей – адна з прыярытэтных задач структуры МНС. І ў вырашэнні яе заслуга прэсы – вялізная.
Асабіста я працую ў райаддзеле з 2012 года, і за гэты час з калектывам рэдакцыі і галоўным рэдактарам Наталляй Хадаковай у нас склаліся шчырыя адносіны ўзаемаразумення. Журналісты называюць мяне няштатным карэспандэнтам. А па сутнасці так і атрымліваецца: большай колькасці матэрыялаў, якія я па службовым абавязку прадастаўляю для друку, не прыходзіць у рэдакцыю, бадай, ні ад якой іншай арганізацыі ці ўстановы.
Напярэдадні Дня друку хачу павіншаваць калектыў “Кіраўца” з прафесійным святам, пажадаць здароўя, цікавай творчай работы і радаваць чытачоў новымі публікацыямі!

 

Подписывайтесь на нас в социальных сетях: «Одноклассники» и «Одноклассники» (группа), «ВКонтакте», «Фейсбук», «Instagram», «Telegram», «Яндекс Дзен».

 

 

Добавить комментарий

Ваш адрес email не будет опубликован.