Мары збываюцца…
У чэрвені 2001 года пасля таго, як кіраўчане сталі гараджанамі, карэспандэнт раённай газеты “Кіравец” сустрэўся з групай выпускнікоў СШ №2 імя К.П.Арлоўскага і папрасіў адказаць на шэраг пытанняў, у тым ліку пра тое, што б яны жадалі бачыць у родным горадзе ў плане лепшых умоў для пражывання.
Інтэрв’ю было апублікавана ў “раёнцы”. Вярнуцца да яго праз 20 год вымусілі цікавыя назіранні наконт таго, што мары збываюцца…
Іван Бяляўскі адзначыў: “Як бы наш горад папрыгажэў, калі б у ім быў фантан!”. І вось праз пэўны час у гарадскім парку з’явіўся фантан на радасць дзецям, моладзі, усім кіраўчанам і гасцям горада.
У Таццяны Анісімавай былі пажаданні наконт гарадскога парку: каб стаў ён сапраўдным паркам культуры і адпачынку – было б дзе пасядзець з сябрамі, адпачыць, паназіраць за наваколлем… І вось сёння наш парк менавіта такі, з дзіцячымі горкамі, спартыўнай пляцоўкай, цікавымі малымі архітэктурнымі формамі, лавамі, павільёнам “Ля фантана”… Таццяна тады дадала яшчэ адну фразу: каб вакол нічога не было зламана. На жаль, яшчэ не зжыты выпадкі нядбайных адносін некаторых мясцовых і немясцовых асоб да элементаў упрыгожвання. Будзем спадзявацца, што другое пажаданне выпускніцы-2001 таксама здзейсніцца.
Антон Данілаў адзначыў: яму прыемна, што Кіраўск прыгожы, патанае ў зеляніне дрэў, што на зямлі Кіраўшчыны нямала помнікаў, якія нагадваюць аб мінулым роднага краю. Горад вылучаецца чысцінёй, утульнасцю. Але пажадана, каб усе кіраўчане больш сачылі за парадкам вакол сваіх дамоў, і маладым людзям трэба быць больш культурнымі.
З гадамі многае змянілася, але для некаторых грамадзян дадзеныя пажаданні актуальныя і сёння.
Яшчэ Антон дадаў: хочацца, каб усе жылі дружна і імкнуліся да адзінай мэты.
Усе рабяты адзначылі, што любяць родны Кіраўск і, як бы ні склалася жыццё, заўжды будуць памятаць свае карані і малую радзіму…