Сёння ў адрас жанчын Кіраўшчыны гучалі шчырыя словы віншаванняў з Днём маці.
Старшыня райвыканкама Галіна Слабоднікава і яе намеснік Таццяна Бяляўская наведалі шэраг мнагадзетных сем’яў, дзе адрасавалі маці словы ўдзячнасці за адказнае стаўленне да выхавання дзяцей, актыўную жыццёвую і грамадзянскую пазіцыю, за тое, што вучаць сваіх сыноў і дачок любіць малую радзіму.

Віншаванні прымалі спецыяліст КСУП “Барчыцы-агра” Кацярына Фядотава, педагог-арганізатар Жыліцкага сельгаскаледжа Настасся Шчэрбіч, кандытар райспажыўтаварыства Алена Іванова, агароднінавод цяплічнага камбіната ААТ “Рассвет імя К.П.Арлоўскага” Ганна Новікава, лабарант па якасці малака ААТ “Кіраўскае райаграпрамтэхзабеспячэнне” Кацярына Храмовіч.

Як адзначыла Галіна Слабоднікава падчас віншаванняў, менавіта Дзень маці адпавядае самым лепшым традыцыям адносін беларусаў да мацярынства. Гэтае светлае і шчырае свята аб’ядноўвае ўсіх нас, вучыць быць міласэрнымі, удзячнымі і чулымі. Для кожнага матуля – галоўны чалавек у жыцці, яе любоў і вера падтрымліваюць у любым узросце, а тое добрае, чаму яна вучыць, – застаецца з намі назаўсёды.
Звяртаючыся да мнагадзетных маці, старшыня райвыканкама нагадала, што ў большасці сваёй менавіта ад жанчыны залежаць не толькі дабрабыт у сем’ях, але і будучыня нашай краіны, бо сённяшнім хлопчыкам і дзяўчынкам у хуткім часе давядзецца вырашаць лёс Беларусі. Таму вельмі важна прывіваць дзецям любоў да сваёй Радзімы, павагу да слаўнай гісторыі беларускага народа, гонар за сваю краіну.
Ад раённага выканаўчага камітэта Галіна Слабоднікава ўручыла жанчынам-маці падарункі і кветкі, а таксама пажадала, каб дзеці радавалі іх поспехамі і дасягненнямі, былі ўважлівымі і клапатлівымі, а кожны дзень прыносіў мір, цеплыню і радасць.
Фота Максіма МІКЕШЫНА.