У чарадзе веснавых клопатаў. Раннюю яравую сяўбу завяршылі земляробы КСУП «Чырвоны баец»

Упрэўнена вядуць веснавую палявую кампанію аграрыі КСУП “Чырвоны баец”. Прамарудзіць з тэмпамі, не ўкласціся ў аптымальныя тэрміны – значыць, недабраць ураджаю і адпаведна не далічыцца пэўных фінансавых сродкаў. Гэтую няпісаную формулу добра ведаюць у сельгаспрадпрыемстве, таму імкнуцца выкарыстаць кожную спрыяльную хвіліну, каб правесці своечасова і якасна ўсе палявыя работы.

Мы наведалі гаспадарку напрыканцы мінулага тыдня. Своеасаблівую экскурсію па мясцовых палетках для карэспандэнта “раёнкі” на імклівай “Ніве” арганізавалі галоўны аграном Сяргей Глушакоў і шматгадовы нязменны брыгадзір Фёдар Еўдакімаў – каму як не ім дакладна валодаць сітуацыяй і заадно, у каторы раз за дзень, “праверыць пасты”.

Аднак на “пастах”, працэс быў наладжаны належным чынам, у чым можна было ўпэўніцца. Кожны механізатар на сваім участку выконваў даручанае заданне дакладна і старанна. І тут усё зразумела: практычна ўсе – вопытныя знаўцы земляробскай справы.

Сяўбу збожжавых вялі ў гэты дзень адразу на двух участках: на адным – Аляксей Масюковіч, пасяўны агрэгат якога запраўляе яго аднафамілец Аляксандр Масюковіч, на другім – Аляксандр Макаронак, якому дастаўляе і загружае насенне Юрый Іваніцкі. Рыхтуюць глебу пад сяўбу культыватарамі Валерый Дырыкаў і Яўген Кандраценка.

Валерый Дырыкаў рыхтуе глебу пад сяўбу

Як адзначылі тэхнолагі палёў, раннімі яравымі ў гаспадарцы будзе засеяна 323 га. З іх – 185 га зойме ячмень, прычым 92 га – піваварны, ураджай якога будзе накіраваны ў кошт дзяржзаказу. Астатнія плошчы зоймуць зернебабовымі культурамі.

Ворыва пад сяўбу кукурузы і цукровых буракоў вядзе вопытны механізатар, адзін з лідараў працоўнага спаборніцтва ў раёне на розных работах Дзмітрый Аляксееў. Поле за ім – баразна ў баразну, нібыта пад лінейку. Дарэчы, “царыца палёў” раскінецца ў “Чырвоным байцы” на 570 га, з іх 105 га – на зерне. А салодкія карані плануецца размясціць на 275 га. Плюс упершыню гаспадарцы даведзены план вырасціць на 5 га сталовыя буракі.

Якасна ўзворвае глебу Дзмітрый Аляксееў

Глеба пад кукурузу ўгнойваецца арганікай. Унесена яе 22185 т. На гэтым участку працуе цэлая брыгада. На пагрузчыку “Амкадор” задзейнічаны Сяргей Барадзін. Уносяць угнаенні Дзяніс Казанцаў і Сяргей Бяляўскі. Не абыходзіцца палявая кампанія і без увагі жанчын. Улік рэйсаў і танаж унесенай арганікі уважліва вядзе ўчотчык Паліна Буднікава.

Дзяніс Казанцаў, Сяргей Бяляўскі, Паліна Буднікава, Сяргей Барадзін

Па словах мясцовых спецыялістаў, добрымі выйшлі з зімоўкі азімыя культуры. Ім, безумоўна, адразу ж пастараліся надаць росту і сіл. Першая падкормка была праведзена на 900 га, зараз вядзецца другая – па зазелянелай руні жыта і крыжакветных. На гэтым участку старанна працуюць Аляксандр Сіндараў і Віктар Аляксееў.

Як нам паведамілі ў сельгаспрадпрыемстве ў панядзелак, план па сяўбе ранніх яравых культур за выхадныя ўжо закрыты на 100%. Увага пераключаецца на сяўбу цукровых буракоў. Час не чакае!..

Аляксандр ХАХЛОЎ.

На здымку ўварсе: на сяўбе яравых зтаранна працуюць Аляксандр і Аляксей Масюковічы.

Фота аўтара.

Добавить комментарий

Ваш адрес email не будет опубликован.