Аграрыі Кіраўшчыны адзначылі прафесійнае свята: ААТ “Рассвет імя К.П. Арлоўскага”
ААТ “Рассвет імя К.П. Арлоўскага” заўсёды славілася моцнымі сельскагаспадарчымі традыцыямі, надзейнымі і вернымі выбранай справе людзьмі, дзякуючы якім жыве і працвітае ўрадлівая ніва.
Павіншаваць рассветаўцаў з прафесійным святам і дасягнутымі вынікамі завіталі першы намеснік старшыні райвыканкама – начальнік упраўлення па сельскай гаспадарцы і харчаванні Аляксандр Кісялёў, начальнік рэгіянальнай дырэкцыі па Магілёўскай вобласці ААТ “Белаграпрамбанк” Андрэй Горбель, старшыня Мышкавіцкага сельвыканкама Жанна Камінская, старшыня райкама прафсаюза работнікаў АПК Віктар Ставер і іншыя.
Па традыцыі дырэктара таварыства Аляксандра Багеля сустрэлі на сцэне духмяным пышным караваем.
– Сёння мы сабраліся, каб аддаць даніну павагі няпростай сялянскай працы, – пачаў сваё выступленне Аляксандр Іванавіч. – па традыцыі мы ўспамінаем людзей, якія залажылі аснову сучаснага “Рассвета”, і якіх усе мы добра ведаем: Кірыл Арлоўскі, Васіль Старавойтаў, Феадосія Кісялёва, Галіна Елісеенка, Хрысціна Міхнёва і шмат хто іншы.
Асаблівыя словы падзякі кіраўнік гаспадаркі выказаў ветэранам, спецыялістам, усім рассветаўцам. Ён падкрэсліў, што эканамічны дабрабыт гаспадаркі неразрыўна звязаны з дзвюма асноўнымі галінамі вытворчасці: раслінаводствам і жывёлагадоўляй, а галоўным багаццем “Рассвета” быў і застаецца хлеб.
– Нягледзячы на капрызы надвор’я, дзякуючы намаганням і высокаму прафесіяналізму людзей, сёлета мы вырасцілі добры ўраджай. Побач з вопытнымі хлебаробамі шчыравала моладзь, – дырэктар падрабязней спыніўся на паказчыках у раслінаводстве, жывёлагадоўлі і іншых галінах вытворчасці і сацыяльнай сферы (аб гэтым часта пісалася на старонках раёнкі). – …Упэўнены, што наш “Рассвет” па сацыяльна-эканамічным развіцці і надалей будзе займаць лідзіруючыя пазіцыі ў раёне, вобласці і рэспубліцы. У нас ёсць праблемы, якія неабходна вырашаць, але ёсць мэты і задачы на больш далёкую перспектыву. І мы абавязкова справімся з імі.
Начальнік упраўлення па сельскай гаспадарцы і харчаванні райвыканкама Аляксандр Кісялёў у сваім прывітальным слове адзначыў, што сёлета аграрыі Кіраўшчыны добра справіліся з пастаўленымі задачамі: аднымі з першых на Магілёўшчыне завяршылі ўборку зерневых, у поўным аб’ёме выканалі дзяржзаказ, па многіх накірунках атрыманы лепшыя паказчыкі за апошнія 10 год. І ў гэтым вялікая заслуга рассветаўцаў, якія на справе паказваюць, што ўмеюць гаспадарыць па-сучаснаму, эфектыўна і старанна дасягаць пастаўленых мэт. Ён адзначыў, што гаспадарка не стаіць на месцы, асвойвае новыя далягляды, вырабляе экспартаарыентаваную прадукцыю.
– Дзякуючы вашай нялёгкай добрасумленнай працы, напаўняюцца засекі нашай дзяржавы, умацоўваецца яе эканоміка. У працы вы праяўляеце лепшыя чалавечыя якасці, беражлівае стаўленне і вернасць роднай зямлі, трываласць і цярпенне, – падкрэсліў, звяртаючыся да прысутных, Аляксандр Васільевіч. – Цяпер перад вамі стаіць задача не толькі ўтрымаць узятыя тэмпы, але і знайсці ўнутраныя рэзервы для новых дасягненняў.
Намеснік старшыні райвыканкама ўручыў заслужаныя ўзнагароды рассветаўцам: дыплом І ступені Міністэрства сельскай гаспадаркі і харчавання Рэспублікі Беларусь – калектыву ААТ “Рассвет імя К.П. Арлоўскага”, Ганаровую грамату Магілёўскага аблвыканкама – трактарысту-машыністу Мікалаю Дразду. Ганаровыя дыпломы Магілёўскага аблвыканкама атрымалі агародніца Валянціна Цішкова, звяно аператараў машыннага даення ў саставе Сяргея Плахотнікаваі Таццяны Недасекінай, аператары машыннага даення Ірына Міхалап і Алена Дзікарэвіч, дыпломы Кіраўскага райвыканкама – трактарысты-машыністы Андрэй Дрозд, Сяргей Фамін, Канстанцін Пятруша, Ігар Гаўрылюк і Мікалай Дрозд.
Начальнік рэгіянальнай дырэкцыі па Магілёўскай вобласці ААТ “Белаграпрамбанк”Андрэй Горбель адзначыў, што заўсёды прыемна чуць аб дасягненнях “Рассвета”, і выказаў упэўненасць, што і надалей гаспадарка толькі будзе набіраць абароты, застанецца флагманам сельскай гаспадаркі, а маючыя працоўныя традыцыі толькі прымножацца. Андрэй Міхайлавіч уручыў Падзячныя пісьмы і грашовыя сертыфікаты галоўнаму тэхнолагу вытворчага ўчастка “Сад” Алене Юркавец і загадчыку аўтагаража Яўгену Зайцаву.
Старшыня райкама прафсаюза работнікаў АПК Віктар Ставер падкрэсліў важкі ўклад рассветаўцаў у харчовую бяспеку нашай дзяржавы і выказаў упэўненасць, што гэты ўклад будзе прырастаць новымі грунтоўнымі дасягненнямі. Віктар Паўлавіч уручыў нагрудныя знакі Кіраўскай раённай прафсаюзнай арганізацыі беларускага прафсаюза работнікаў АПК “За добрасумленную працу” трактарысту-машыністу Аляксандру Гутараву і аператару машыннага даення Ірыне Сушко, Падзякі – трактарысту-машыністу Віктару Зайцаву, майстру-наладчыку станцыі тэхнічнага абслугоўвання Вадзіму Цішкову, рыбаводу Мікалаю Рубленку.
Больш сямідзесяці рассветаўцаў атрымалі ўзнагароды з рук дырэктара гаспадаркі Аляксандра Багеля і старшыні прафкама гаспадаркі Святланы Акуліч.
Самадзейныя і прафесійныя артысты віншавалі герояў урачыстасці і дзякавалі ім за добрасумленную працу.
Галіна РУСЕЦКАЯ.
Фота Максіма МІКЕШЫНА.