Аграрыі Кіраўшчыны адзначылі прафесійнае свята: КСУП “Барчыцы-агра”
Святочныя ўрачыстасці з нагоды прафесійнага свята аграрыяў прайшлі ў КСУП “Барчыцы-агра”. Ганаровы госць свята першы намеснік старшыні райвыканкама – начальнік упраўлення па сельскай гаспадарцы і харчаванні Аляксандр Кісялёў пазнаёміў прысутных з вынікамі работы сельскагаспадарчай галіны раёна, падзякаваў аграрыям за штодзённую карпатлівую працу і ўручыў аператару жывёлагадоўчых комплексаў і механізаваных ферм Алене Волас Ганаровую грамату ўпраўлення па сельскай гаспадарцы і харчаванні райвыканкама.
Старшыня райкама прафсаюза работнікаў АПК Віктар Ставер шчыра павіншаваў вяскоўцаў з прафесійным святам. Падзяку Кіраўскай раённай прафсаюзнай арганізацыі атрымаў тэхнік-асемянатар Васіль Фядотаў.
Дырэктар прадпрыемства Уладзімір Ядчанка падзякаваў усім за добрасумленную працу і заўважыў, што па выніках каляндарнага года вытворчыя паказчыкі гаспадаркі будуць вышэйшымі. Ён уручыў Граматы лепшым работнікам прадпрыемства і адзначыў, што расці ёсць куды, і чалавечы патэнцыял у гаспадарцы таксама ёсць, галоўнае – павінна быць жаданне працаваць.
Старшыня прафкама гаспадаркі Галіна Дзятлава з душэўнай цеплынёй гаварыла аб вяскоўцах і ўзаемнай рабоце падчас асноўных сельскагаспадарчых кампаній.
Кажуць, дзе хлеб, там і песня. Віноўнікі ўрачыстасці прымалі музычныя віншаванні ад работнікаў Скрыпліцкага Дома культуры.
Галіна РУСЕЦКАЯ.
Фота Максіма МІКЕШЫНА.