Аншлаг быў у Дабаснянскім СДК, дзе з нагоды свята сабраліся працаўнікі ААТ “Дабаснянскае”: механізатары, паляводы, жывёлаводы, вадзіцелі, спецыялісты – усе, хто працуе для працвітання роднай гаспадаркі і краіны.

Са словамі віншаванняў і шчырымі пажаданнямі да прысутных звярнуўся намеснік начальніка райсельгасхарчу Іван Грышчанка. Ён адзначыў, што Кіраўскі раён сёлета дасягнуў высокіх паказчыкаў у сельгасвытворчасці, і пэўную долю ў гэтым разам з іншымі адыгралі і прадстаўнікі “Дабаснянскага”. У гаспадарцы ў 1,3 раза атрымана больш, чым у папярэднім годзе, збожжавых і зернебабовых. У 2021 годзе ўпершыню дабаснянцы перакрочылі 6-тысячны рубеж па надоі малака ў разліку на карову. Сёлета таксама праглядаецца станоўчая дынаміка і чакаецца, што паказчык будзе палепшаны.

Іван Грышчанка ўручыў Ганаровую грамату райвыканкама начальніку вытворчага ўчастка МТФ “Дабрыца” Таццяне Маславай. Актывісту прафсаюзнага жыцця, перадавіку вытворчасці трактарысту-машыністу Юрыю Бычкову Ганаровую грамату райкама прафсаюза работнікаў АПК уручыла спецыяліст райкама Ларыса Ярковіч.

Шэрагу работнікаў сельгасарганізацыі яе дырэктар Аляксандр Вербінаў уручыў Ганаровыя граматы, кветкі і грашовыя прэміі за плённую і добрасумленную працу.
Падарункам для ўсіх прысутных стаў канцэрт выкладчыкаў і навучэнцаў Жыліцкай дзіцячай школы мастацтваў.

Аляксандр ХАХЛОЎ.

Фота аўтара.