Мы памятаем…
34 гады аддзяляюць нас ад памятных дзён, калі савецкія войскі пакінулі
Афганістан. 9 год і 51 дзень тысячы салдат і афіцэраў з гонарам выконвалі
інтэрнацыянальны абавязак. Гэтая вайна закранула лёсы многіх нашых
суайчыннікаў. 82 жыхарам Кіраўшчыны давялося прайсці праз яе горан.
Штогод, 15 лютага, у Дзень памяці воінаў-інтэрнацыяналістаў жыхары
Кіраўшчыны збіраюцца каля памятнага знака ў гонар воінаў-кіраўчан, якія
выконвалі інтэрнацыянальны абавязак пры ліквідацыі лакальных канфліктаў,
каб успомніць пра падзеі афганскай вайны і ўшанаваць памяць загінуўшых
землякоў – Пятра Петрусевіча, Віктара Шумілава і Аляксандра Ядлоўскага.
Падчас мітынгу старшыня райвыканкама Галіна Слабоднікава, завяртаючыся да
прысутных воінаў-інтэрнацыяналістаў і прадстаўнікоў грамадскасці,
адзначыла: “Вайна ў Афганістане дала савецкім войскам практычна першы ў
свеце вопыт падрыхтоўкі і вядзення баявых дзеянняў супраць рэгулярных
фарміраванняў ва ўмовах горна-пустыннай мясцовасці. Менавіта
воіны-інтэрнацыяналісты першымі кінулі выклік міжнароднаму тэрарызму.
Баявы вопыт афіцэраў, салдат, якія праходзілі службу ў розныя гады ў
саставе абмежаванага кантынгенту савецкіх войскаў у Афганістане,
рэалізуюцца і сёння ў ваенным будаўніцтве і падрыхтоўцы Узброеных Сіл
Рэспублікі Беларусь”.
Сёння ва ўмовах глабальнай нестабільнасці і напружанага ваенна-палітычнага
становішча, трывожных выклікаў сучаснасці памяць аб падзеях афганскай
вайны вучыць нас разумець, наколькі каштоўны мір.
15 лютага ўвага грамадскасці прыцягнута не толькі да ветэранаў вайны ў
Афганістане, а і да тых, хто выконваў воінскі інтэрнацыянальны абавязак
больш чым у 30 гарачых кропках свету: Карэі, Егіпце, Анголе…
Начальнік адасобленай групы Кіраўскага раёна Бабруйскага аб’яднанага
гарадскога Ваеннага камісарыята маёр Мікалай Маліноўскі падкрэсліў: “Нашы
суайчыннікі – удзельнікі вайны ў Афганістане і іншых лакальных канфліктаў
– з гонарам выканалі свой воінскі абавязак, праяўляючы пры гэтым мужнасць,
стойкі гераізм. Зараз, у мірныя дні, многія з іх нясуць у грамадства
высокае пачуццё грамадзянскага абавязку і вернасці воінскай прысязе,
вучаць падрастаючае пакаленне адстойваць свае жыццёвыя прынцыпы і любіць
Радзіму”.
Мінутай маўчання ўшанавалі памяць загінуўшых у Афганістане
воінаў-інтэрнацыяналістаў, а таксама тых землякоў-кіраўчан, якія вярнуліся
з вайны, уліліся ў мірнае стваральнае жыццё, але каго ў сённяшнім дні
разам з намі ўжо няма: Уладзіміра Перадні, Барыса Карпенкі, Сяргея
Макаранкі, Валерыя Гузялевіча, Уладзіміра Краўчанкі, Васіля Бяляўскага,
Сяргея Пятрова, Сяргея Шуфелева, Аляксандра Сенчанкова, Валерыя Чыканава,
Генадзя Барышчыка. Юнакі з іх партрэтамі ў руках сталі побач з прысутнымі
на мітынгу воінамі-інтэрнацыяналістамі. Нязрыма яны, іх душы зноў былі
побач з баявымі таварышамі, сябрамі, усімі, хто неабыякавы да гэтага дня і
памяці…
Пасля мітынгу адбылося ўскладанне вянкоў і кветак да магіл Пятра
Петрусевіча, Віктара Шумілава ў в.Гарадзец і Аляксандра Ядлоўскага ў
аг.Жылічы. У цырымоніі прынялі ўдзел родныя і блізкія загінуўшых.
Мы памятаем… Мы жывем…
Яўгенія БЯЛЬКО.
Фота Максіма МІКЕШЫНА.