Падведзены вынікі творчага конкурсу сярод чытачоў “Кіраўца”
Рэдакцыя раённай газеты “Кіравец” днямі прымала ганаровых гасцей – пераможцаў і ўдзельнікаў конкурсу творчых работ “Мае думкі пра цябе, Беларусь!”, прысвечанага Году гістарычнай памяці.
Творчае спаборніцтва праводзілася сярод аўтараў артыкулаў, апавяданняў, вершаў пра любімую Беларусь, яе гераічнае гістарычнае мінулае, суайчыннікаў. Лепшыя творы, дасланыя ў рэдакцыю, былі апублікаваныя на старонках “Кіраўца”, а іх аўтары запрошаны ў рэдакцыю на цырымонію ўзнагароджвання пераможцаў.
Сярод асноўных задач конкурсу, акрамя іншага, было і стварэнне ўмоў для выхавання творчай асобы з развітым эстэтычным густам; выяўленне, раскрыццё і падтрымка таленавітых жыхароў раёна. На думку галоўнага рэдактара “раёнкі” Галіны Русецкай, ажжыццявіць іх удалося – на старонках газеты з’явіліся творы і тых аўтараў, з творчасцю якіх чытачы ўжо вядомыя, і заззялі новыя зорачкі на небасхіле талентаў Кіраўшчыны.
Па рэзультатах конкурсу першае месца прысуджана маладому кіраўчаніну Уладзіславу Чэкулаеву. Юнак даслаў у рэдакцыю адразу дзве творчыя работы – верш “Думкі пра Беларусь…” і артыкул-разважанне “Думкі пра будучыню…” (апублікаваныя ў №99 ад 27 снежня 2022 года). Уладзіслаў, выпускнік СШ № 2 імя К.П.Арлоўскага, зараз вучыцца на чацвёртым курсе Акадэміі Міністэрства ўнутраных спраў Рэспублікі Беларусь, на факультэце крымінальнай міліцыі. Сёлета яму прадстаіць здаваць выпускныя экзамены і пачынаць самастойнае прафесійнае жыццё. Будучы міліцыянер плануе працаваць ў галіне барацьбы з кіберзлачыннасцю. Уладзіслаў падзяліўся думкамі, што інтарэс да напісання вершаў і прозы ўзнік у яго некалькі год таму, яшчэ падчас вучобы ў школе. Натхняюць яго прырода, людзі – усё, што акружае! Гэтае захапленне падтрымліваюць бацькі юнака, а таксама бабуля – кіраўчанка Галіна Спірыдонава. Да слова, яна таксама прымала ўдзел у рэдакцыйным конкурсе – з вершам “Пра цябе, Беларусь…” (апублікаваны ў №96 ад 16 снежня 2022 года). Галіне Спірыдонавай прысуджана другое месца.
Дыплом за трэцяе месца атрымала жыхарка райцэнтра Ангеліна Карабанава (на здымку). Дарэчы, яна стала першай удзельніцай конкурсу. Ёй належаць радкі цудоўнага верша “Краіна пад белымі крыламі” (апублікаваны ў №88 ад 18 лістапада 2022 года).
Падзякамі за ўдзел у творчым конкурсе адзначаны Аляксандр Ласякоў з Кіраўска, Таццяна Чысцякова з дашкольнага цэнтра развіцця дзіцяці і самы юны аўтар – шасцікласнік Чыгірынскай СШ Раман Рамановіч.
Пераможцы і ўдзельнікі конкурсу ўзнагароджаны Дыпломамі, фірменнымі календарамі ад “Кіраўца” і падарункамі.
Калектыву рэдакцыі вельмі прыемна, што чытачы газеты актыўна адгукаюцца на заклік удзельнічаць у творчых конкурсах. Асабліва прыемна, што сярод канкурсантаў шмат маладых людзей, якія любяць Беларусь, сваю родную Кіраўшчыну, імкнуцца да ўсебаковага развіцця і самаўдасканалення.
Паважаныя чытачы! Спадзяемся на далейшае плённае супрацоўніцтва! Выпісвайце і чытайце “Кіравец” і сачыце за анонсамі новых творчых спаборніцтваў!
Яўгенія БЯЛЬКО.
Фота Максіма МІКЕШЫНА.