Якія імёны ў дзяцей самыя папулярныя на Кіраўшчыне?
Як паведаміла начальнік аддзела ЗАГС Кіраўскага райвыканкама Наталля Хахол, самымі папулярнымі імёнамі ў нашым раёне ў мінулым годзе для хлопчыкаў былі: Максім, Аляксандр, Яўген, Захар, Мацвей, Міхаіл і Цімафей, Арцём, Дзмітрый, Юрый. Не губляе сваёй актуальнасці мода на наступныя імёны: Арсеній, Ягор, Мірон, Ігнацій, Дзям’ян, Яфім, Макар, Савелій, Мікіта, Ігнат, Іван. Сярод рэдкіх імёнаў, якімі летась назвалі сваіх дзяцей жыхары раёна, – Ян, Міраслаў, Глеб, Герман, Давід, Даніэль, Адрыян, Данііл. Толькі па аднаму хлопчыку сталі носьбітамі папулярных раней імёнаў Сяргей, Цімур, Раман, Руслан, Кірыл, Дзяніс, Андрэй, Віктар, Уладзіслаў.
Дзяўчынак часцей называлі Ганнай, Евай, Сафіяй, Варварай, Дар’яй, Эміліяй. Некалькі маленькіх прыгажунь атрымалі цудоўныя, але ўжо крыху падзабытыя імёны: Ульяна, Марыя, Васіліса, Лізавета, Кіра, Марта, Юлія, Паліна. Некаторыя бацькі вырашылі быць больш арыгінальнымі, назваўшы сваіх дачок Тэонай, Міяй, Сабінай, Стэфаніяй, Міраславай, Ясеніяй, Амеліяй, Альбінай, Агатай, Анітай, Вячаславай і Уладзіславай. Не зыходзіць мода на імёны Алёна, Валерыя, Вікторыя, Аліса, Арына, Аліна, Яна, Анастасія, Крысціна і Ксенія.
Цікавай для нашых чытачоў будзе статыстыка аддзела ЗАГСа па найбольш папулярных імёнах дзяўчынак і хлопчыкаў за перыяд з 2012 па 2022 гады. Так, за 10 гадоў у раёне зарэгістравана 59 Сафій, 49 Анастасій, 43 Марыі, па 41 – Валерыя, Дар’я і Паліна. Па 40 дзяўчынак з імем Аляксандра і Ксенія, 39 – Мілана, 38 – Вікторыя, 36 – Ганна, 31 – Ульяна, па 29 – Варвара і Ева.
Самыя папулярныя імёны хлопчыкаў – Арцём, іх нарадзілася 73, Мацвееў – 58, Мікіт – 49, Ягораў – 45. Па 44 хлопчыкі атрымалі імя Ілья і Максім, 39 назвалі Аляксандрамі, 38 – Іванамі, 33 – Цімафеямі, 32 – Яраславамі, 29 – Уладзіславамі, па 28 – Данііламі і Міхаіламі.
Па словах Наталлі Хахол, пры выбары імя дзіцяці можна зыходзіць з традыцый сям’і, у адпаведнасці з астралогіяй, рэлігіяй, нацыянальнасцю, а таксама ў адпаведнасці з модай і фантазіяй бацькоў. Але, як адзначыла спецыяліст, арыгінальнічаць трэба ў межах разумнага. У нашай краіне працэс выбару імя дзіцяці кантралюецца Кодэксам аб шлюбе і сям’і, дзе гаворыцца, што абранае імя не павінна супярэчыць нормам маралі і нацыянальным традыцыям. Да таго ж, спіс імён ёсць у спецыяльным даведніку. Калі абранага імя там не будзе, то бацькам неабходна напісаць заяву, каб ім дазволілі назваць дзіця менавіта так, як яны жадаюць. Па законе нельга даваць малышу больш за два імя, прычым першае будзе лічыцца асноўным. Нельга выкарыстоўваць у імені лічбы і нумары, напрыклад “Пётр І” ці “Варвара-2022”, знакі прыпынку акрамя дэфіса, які прымяняецца толькі адін раз. Забараняецца выкарыстоўваць назвы пасад і прафесій (Цар, Князь), ненарматыўную лексіку, словы, якія абражаюць гонар і годнасць дзіцяці, імёны, якія не адпавядаюць маральным прынцыпам, характэрным для грамадзян Беларусі (напрыклад Тузік, Барсік).
Падрыхтавала Людміла СЯМЁНАВА.