Першыя крокі хлебаробаў на пшанічным полі – пад строгім кантролем кіраўніцтва сельгаставарыства: дырэктар “Рассвета” Аляксандр Багель, першы намеснік дырэктара Аляксандр Жылінскі і начальнік участка Галіна Хмуровіч пільна сачылі за ходам сельгасработ. Як адзначыў Аляксандр Багель, віды на сёлетні ўраджай у рассветаўцаў добрыя, надвор’е пакуль спрыяе, таму важна не губляць часу, эфектыўна растаўляць прыярытэты, каб вырашчаны на палях ураджай максімальна пакласці ў засекі. Да слова, рассветаўцы ўжо завяршылі ўборку азімага ячменю, які сёлета парадаваў ураджайнасцю – у сярэднім намалочвалі па 50,1 цэнтнера на круг. Аляксандр Жылінскі дадаў, што вільготнасць зерня вар’іравала ад 8 да 12%. Гэта невысокі паказчык, таму на ачышчальна-сушыльным комплексе намалоты не дасушвалі, а толькі ачышчалі і дапрацоўвалі. Гаспадарка ў поўным аб’ёме выканала дзяржзаказ па здачы гэтай культуры.

Літаральна з дня на дзень рассветаўцы рыхтуюцца выйсці на рапсавыя палеткі. А пакуль пасевы чорнага золата даспяваюць, вырашылі паспрабаваць сілы на пшанічным полі. “Усяго ў гаспадарцы пшаніцай занята 2056 гектараў, – расказаў Аляксандр Валянцінавіч. – На ўзгорках пшаніца ўжо даспела, а недзе нават і падгарэла, іх і пачалі абмалочваць у першую чаргу. У нізінах зерне яшчэ не гатова. Аднак мы чакаем, што праз некалькі дзён яно дойдзе раўнамерна, і тады актыўна распачнём масавую ўборку”.

Сёлета ў сельгаставарыстве на жніве задзейнічана 13 збожжаўборачных экіпажаў. 10 аўтамабіляў
адвозяць свежанамалочанае збожжа ад камбайнаў.

Разам з Галінай Хмуровіч на яе службовым аўтамабілі мы пад’ехалі да так званых асноўных дзеючых асоб жніва – камбайнераў. Пакуль Галіна Ўладзіміраўна кіравала аўтамабілем, падзялілася думкамі: “Ужо некалькі гадоў запар я з’яўляюся начальнікам участка, у ліку іншага наладжваю ход сельгасработ на палетках. А да гэтага працавала галоўным бухгалтарам. І, ведаеце, разумею, што шчыраваць у полі мне падабаецца больш, чым у кабінеце з паперкамі і лічбамі”.

Маладзёжны экіпаж у саставе Андрэя Дразда і Аляксандра Краўцова выгружаў намалот у кузаў магутнага МАЗа, якім кіруе вадзіцель Сяргей Цмыг. Тут жа Аляксандр Жылінскі праводзіў замеры вільготнасці зерня, якое амаль толькі што налівалася ў коласе на полі, а зараз жоўтым золатам блішчыць у руках хлебаробаў. У мінулым годзе Андрэй Дрозд і Аляксандр Краўцоў задалі тон жніву, прычым не толькі ў раёне, – першымі на Магілёўшчыне сярод маладзёжных экіпажаў перакрочылі рубеж у тысячу тон намалоту. І сёлета хлопцы нацэлены на працоўныя перамогі, галоўнае, каб не падвяло надвор’е і тэхніка вытрымала нагрузку.

Побач на пшанічным полі на камбайне “Палессе” шчыравалі стрыечныя браты Аляксандр Пінчук і Назар Сушко. У іх сумеснай працоўнай біяграфіі гэтае жніво трэцяе запар. Першым у хлебаробскую справу прыйшоў Аляксандр. Год папрацаваў і на наступны сезон узяў сабе ў напарнікі брата. Хлопцы адзначылі, што жніво толькі пачынаецца, наперадзе іх чакае па-сапраўднаму гарачая пара. Разуменне таго, што вынік іх працы – гэта ўклад ва ўраджай не толькі сваёй гаспадаркі, але і ўсёй краіны, уздымае настрой. Хлебаробы гатовы да добрасумленнай работы. Няхай усё складваецца найлепшым чынам!

Яўгенія БЯЛЬКО. Фота аўтара.