Гэтымі сонечнымі ліпеньскімі днямі ў кожным куточку Кіраўшчыны кіпіць работа на сельгаспалетках. Ідзе жніво. Залаты час для хлебаробаў.

У сераду, 24 ліпеня, рэдакцыйны аўтамабіль завітаў на Чыгірынскія прасторы. Каля вёскі Колбава працаўнікі СГФ “Чыгірынка” РУП “Беларуснафта-Магілёўаблнафтапрадукт” вялі ўборку азімага жыта. Тры магутныя Гомсельмашаўскія камбайны, якімі кіравалі механізатары Сяргей Чорны, Сяргей Фірагін і Анатоль Кузьмін, нібы караблі, плылі па жытнёвым полі, спрытна зразаючы спелыя каласы. Тут жа на пажарным аўтамабілі дзяжурыў Валерый Шаболда. Сваю справу – кантраляваць на палетках становішча, захоўваць тэхніку пажарнай бяспекі –
ён ведае дасканала, бо шмат гадоў працаваў у раённым аддзеле па надзвычайных сітуацыях, а калі выйшаў на пенсію, працаўладкаваўся ў гаспадарку.

Камбайны рухаліся з хуткасцю каля 5 км у гадзіну. Прыкладна за паўгадзіны яны поўнасцю запоўнілі збожжам бункеры – ад 5 да 7 тон кожны. Два грузавікі застылі ў чаканні. Як толькі на адным з камбайнаў замігала аранжавая лямпчака, МАЗ, за рулём якога вадзіцель Сяргей Іванчыкаў, імгненна падскочыў да яго. З бункера ў кузаў палілося залацістае збожжа… Да слова, Сяргей Іванчыкаў – з кагорты вадзіцеляў-тысячнікаў у раёне.

Камбайнер Сяргей Фірагін знайшоў у сваім шчыльным графіку хлебароба пару хвілін, каб падзяліцца з чытачамі раёнкі ўражаннямі ад сёлетняга жніва: “Настрой на ўборачную ў сельгасфіліяле баявы. За штурвалам камбайнаў вопытныя механізатары, якія добра ведаюць сваю справу. Мы разумеем, што ўраджай на палетках вырашчаны добры, надвор’е спрыяе жніву. Зараз толькі ад нас, камбайнераў, ва­дзіцеляў, залежаць тэрміны ўборачнай і выніковы намалот. Таму стараемся, працуем сумленна”.
З палеткаў грузавікі перавозяць намалоты на зернесушыльны комплекс, дзе збожжа падсушваецца і ачышчаецца.

За ходам уборачнай пільна сачыў галоўны аграном сельгасфіліяла Юрый Смятана. У галіне сельскай гаспадаркі ён працуе 42 гады. Яго вопыту агранома можна толькі пазайздросціць! Можна сказаць, што на палетках у гэтай мясцовасці ён ведае кожны санціметр. Пакуль мы ішлі па іржышчы, Юрый Уладзіміравіч падзяліўся разважаннямі: “Кожнае жніво мае свае адметнасці. Каб убраць вырашчанае ў аптымальныя тэрміны, якасна, унесці свой уклад у харчовую бяспеку краіны, трэба пралічыць шмат варыянтаў. У залежнасці ад спеласці коласу, умоў надвор’я вар’іруем. У гэтым сезоне дажджы праходзяць часта. Аднак, дзякуй Богу, моцнага ўрону непагадзь нам не нанесла. Усе пасевы мы апрацоўваем ростарэгулятарамі, якія выратоўваюць культуры ад палягання”.
Азімае жыта ў сельгасфіліяле пасеяна на плошчы 320 га. Гэтую культуру ўжо ўбралі на палетках у Нямках на плошчы 80 га. Там яна дала ўраджайнасць 51 цэнтнер на круг. Юрый Смятана адзначыў, што гатунак гібрыднага жыта ніколі не падводзіць, дае добры намалот.
Усяго азімы збожжавы клін у гаспадарцы складае 1040 га, яшчэ 120 га – зернебабовыя. Поўнасцю ўбралі азімы ячмень – 400 га. Гэтая культура дала ўраджайнасць 31,1 ц/га. У агульным у сельгасфіліяле ўжо перакрочылі экватар: абмалацілі крыху больш за палову пасяўных плошчаў.
Паралельна з уборачнай вядзецца ворыва пад пасевы азімага рапсу, у глебу ўносяцца мінеральныя ўгнаенні, нарыхтоўваецца сена, два трактары з прэс­падборшчыкамі задзейнічаны на ўборцы саломы.
Яўгенія БЯЛЬКО.
Фота аўтара.