Кіраўшчына славіцца добрасумленнымі і таленавітымі хлебаробамі. Плячо ў плячо з механізатарамі, на рахунку якіх не адно жніво, з поўнай самааддачай на палетках шчыруе і моладзь. У іх ліку маладыя хлебаробы філіяла “СВК “Бераснёўскі” ААТ “Упраўляючая кампанія холдынга “Бабруйскаграмаш” Павел Іваноў і Яўген Міхалап. Абодва – патомныя механізатары, у “Бераснёўскім” шмат гадоў працавалі іх бацькі, якія з маленства бралі іх з сабой на работу, прывучаючы да прамудрасцяў земляробчай справы.

Павел Іваноў сапраўды з сельгастэхнікай з дзяцінства на “ты”, пераняў вопыт ад свайго бацькі, а зараз прывучае любіць зямлю-карміцельку і сумленна на ёй працаваць свайго сына Мацвея.
Яўген Міхалап шчыруе ў пары з Паўлам і адначасова задзейнічаны на адвозцы збожжа: на трактары МТЗ-1221 з прычэпам адвозіць намалоты ад камбайнаў на збожжаток. Так хлопцы працуюць не першы год, і, як паказала практыка, гэты прыём апраўдвае сябе.

Абодва механізатары родам з Баравіцы. Тут выраслі, тут знайшлі сваё прызванне – добрасумленна працаваць на малой радзіме, прымнажаючы асабісты і агульны дабрабыт.

Падчас некалькіх хвілін перапынку маладыя людзі падзяліліся разважаннямі і сышліся ў думцы: часта моладзь кідае працу ў полі, у галіне сельскай гаспадаркі, маўляў, яна забірае шмат часу і сіл. Так, падчас жніва наогул няма выхадных, аднак той, хто шчыра палюбіў поле, гул камбайнаў, налітыя каласы, не можа пакінуць гэтую справу.

Па стане на раніцу 5 жніўня працаўнікі філіяла “СВК “Бераснёўскі” першымі ў раёне завяршылі Жніво-2024. Як паведаміў галоўны аграном гаспадаркі Леанід Панчэня, падчас уборачнай кампаніі мясцовыя хлебаробы абмалацілі збожжавыя і зернебабовыя культуры больш чым на 1400 га, 125 га займаў рапс. На жніве было задзейнічана 5 камбайнаў, за штурваламі якіх побач з Івановым і Міхалапам, якія, да слова, лідзіравалі ў гаспадарцы па намалотах, Уладзімір Грамыка, Віктар Скрыпуноў, Аляксандр Карасёў, экіпаж у саставе Генадзя Доўкшы і Уладзіміра Бакатовіча. Пяць адзінак тэхнікі адвозілі ўраджай з палеткаў у засекі, за рулём МАЗаў і трактароў былі Іван Белы, Алег Грынфельд, Уладзімір Бакатовіч, Яўген Міхалап і Аляксандр Жудро. Да слова, Аляксандр Жудро перавёз больш за тысячу тон збожжа.

Яўгенія БЯЛЬКО. Фота аўтара.